Hanssen reagerer etter at fleire sentrale imamar i Noreg har avvist at det var muslimar som stod bak terroren i USA 11. september 2001, og at Al Qaida og Osama bin Laden er funne opp av USA for å legitimere krigføringa i Irak og i Afghanistan.
- Dette er ekstreme synspunkt. Og det er spesielt alvorleg at det er sentrale imamar, som er rådgjevarar for andre muslimar, som seier dette, seier han.
Får støtte
Det var imamen Zulqarnain Sakander Madni som kom dei oppsiktsvekkjande fråsegnene i eit nettmøte med Aftenposten tidlegare denne veka. Seinare har han fått støtte i synspunkta sine frå andre imamar i Noreg.
Bjarne Håkon Hanssen er redd for dei reaksjonane slike utspel skapar i det norske samfunnet, og fryktar at dette kan auke distansen mellom innvandrarar og andre nordmenn.
Informasjonsleiar i Islamsk Råd Norge, Mohammed Osman Rana, er også sjokkert, men han er sjokkert over det ramaskriket fråsegnene til dei norske imamane har skapt. Han minner om at det er ytringsfridom i Noreg.
- Skuffande
Han går hardt ut mot Bjarne Håkon Hanssen sin kritikk av imamane, og ber han hugse på at ein tredel av innbyggjarane i USA tvilar på den offisielle forklaringa på kva som skjedde i i tida før 11. september 2001.
- Det er skuffande at Hanssen brukar media til å kome med slike utspel, seier Rana, og legg til at statsråden ikkje har teke direkte kontakt med dei.
Mohammed Osman Rana seier også at Islamsk Råd ber imamar om ikkje å uttale seg om slike kontroversielle spørsmål, og at dei skal konsentrere seg om tema som handlar om religion.
