– Det er trist og sjokkerande at Armstrong har dopa seg. Eg er overraska over at det har vore sett i eit så omfattande system, sa Hushovd på ein pressekonferanse fredag.
– Eg innser no at opplysningane kring Armstrong er riktig, sa Grimstad-syklisten.
Hushovd gjer det også klart at han ikkje vil ta kontakt med den amerikanske syklisten.
– Eg kjem ikkje til å ringje og støtte han no, seier Grimstad-syklisten.
Hushovd skulle eigentleg presentere sitt eige sykkellag Plussbank BMC på ein pressekonferanse, men fekk spørsmål frå pressa kring Lance Armstrong.
Nekta å snakke
I sommar fekk ikkje Hushovd lov til å seie eit einaste ord om dopingskuldingane av BMC-leiinga.
– Eg kan ikkje seie så mykje om saka. Eg får ikkje lov, sa Hushovd.
Onsdag sende det amerikanske antidopingbyrået (USADA) over dokumenta i dopingsaka mot Lance Armstrong til Det Internasjonale Sykkelforbundet (UCI).
Rapporten på 1000 sider slo fast at Armstrong har teke i bruk det mest omfattande dopingprogrammet nokosinne for å oppnå sigrarar på sykkelsetet.
I sommar vart Armstrong utestengd frå all organisert idrett på livstid. Samstundes vart han fråteken alle sju sigrar i Tour de France frå 1999 til 2005.
– Kan øydeleggje norsk VM
Tidlegare fredag frykta sykkelpresident Harald Tiedemann Hansen at dopingsaka mot Armstrong kan øydeleggje eit eventuelt sykkel-VM i Norge.
– Vi er heilt avhengig av goodwill for å kunne arrangere eit sykkel-VM. Goodwill frå politikarar, innbyggjarane i Bergen, ja heile Norge, sa han til Aftenposten.
– Og så treng vi sjølvsagt nokre kroner for å finansiere opp eit VM. Og allereie før dette siste kom opp har vi fått nei frå nokre på grunn av sportens dopinghistorikk, seier Tiedemann Hansen.