– Vi hadde vore ute å leika med ungane og hadde nett komme inn då vi høyrde eit gedigent brak. Då vi såg ut hadde «Berit» røska opp naboen si store osp, seier Kari Jeppestøl Arntzen til NRK.no.
Småbarnsmora jobbar til dagleg i NRK.
– Skummelt
– Berre flaks gjorde at vi hadde gått inn fem minutt før. Det er der barna leikar, og vi er sjølvsagt sjeleglad for at det gjekk godt, seier ho.
Verre gjekk det med arbeidsbilen til ektemannen Trond Holmquist Arntzen. Den vart smadra av det store treet, og har tydelege skader etter at treet deisa i bakken.
– Det er der barna plar leike. Dette var skummelt, men no er heldigvis treet borte, seier Jeppestøl Arntzen.
Herja i Sør-Norge
Uvêret har hjera i Sør-Norge i helga. På Sørlandet har tre blitt reve ned av vinden. I Setesdal måtte bilistane sjølve ordne opp og flytte trea for å komme seg vidare.
– Det er nesten utruleg at ingen har blitt skada. Vi stoppa vel fem gonger der vi måtte fjerne tre frå vegbana, seier Kjetil Pedersen til NRK.no.
Også i samband med tenning av julegrana skapte vinden problem fleire stader. Berre ein halvtime etter tenninga i Arendal reiv vinden grana ned. Heldigvis var ingen personar i nærleiken.
PANG: Bilen som sto parkert fekk merke naturkreftene då ospa vart teken av vinden.
Foto: Kari Jeppestøl Arntzen/NRK
