– Det er den meste sentrale personen i kommunen, seier han.
- NRKs Valgomat: Test deg selv!
Med drøye to veker at til valet byrjar tida å renne ut for ordførarkandidatane i kommunane rundt om i landet. I Kristiansand hadde mange veljarar problem med å seie kva Høgre sin ordførarkandidat Arvid Grundekjøn står for, då vi var ute på gata i dag.
– Å Gud!
– Å Gud, det er jo han ordførarkandidaten til Høgre. Men eg hugsar ikkje kva han heiter, sa Anita Hammerø.
Samstundes var mange på førenamn med Arbeiderpartiet sin kandidat Mette Gundersen i den same byen.
– Eg legg merke til at eg heile tida seie Mette, samstundes som eg seier Grundekjøn om han. Det trur eg har med å gjere at Mette har komme nærare enn Grundekjøn, eller det Arvid har gjort, ler Løvåsen.
– Til no har den eine kandidaten gjort det sterkare enn den andre. Vi hugsar Mette Gundersen betre enn den andre iallefall førebels, seier høgskulelektoren.
Må vise ansikt
Kvinen meiner at partia rundt om i landet ofte er for lite flinke til å finne dei rette personane når det gjeld å finne ordførarkandiatar.
– Det handlar om å finne ein person som kan stå opp og fram for kommunen, og som er synleg. Du må velje ein person som kan stå fram i media og fronte sine saker, seier han.
– Jo mindre kommunen er, jo meir vel du på person. Det er veldig viktig å vise ansikt. Ein treng nokre gallionsfigurar som viser seg for sitt politiske parti, seier Kvinen.
Professor Frank Aarebrot meiner at ein ordførar bør stå fram på denne måten:
– Han må vere humørfylt og vennleg. Ordføraren skal vere ein seremonimeister for heile folket. Han skal vere «imaget» utad på linje med sognepresten i kommunen, seier Aarebrot til NRK.no.
23 år som ordførar
Aarebrot meiner også at det er ein stor fordel å stille med den same ordførarkandidaten val etter val.
– Det er ganske lett å vere ordførar, bortsett frå dei som gjer ein tydeleg dårleg jobb. Gjer du ein ok eller ein god jobb vil ein oppleve ein betydeleg gjenvalseffekt, seier han.
I Bykle kommune i Aust-Agder har Kay Jeiskelid vore ordførar i heile 23 år. I vår ville han gi seg, men ombestemte seg og tek likevel gjenval. Ordføraren har fått tittelen «Kongen av Setesdal».
– Det er slett ikkje dumt å stille med same ordførarkandidat i 110 år, seier Aarebrot.
Sympatistemmer
Høgskulelektor Tor Geir Kvinen peikar også på ein ordførar bør vere sjølvsikker.
– Det er utruleg viktig korleis du handterer omgivnadene. Det er kanskje noko av det viktigaste for ein politikar. Det er viktig å vere sjølvsikker, men du må vere passe sjølvsikker. Ein del ordførarar har nok ein del å gå på når det gjeld å vise seg i omgivnadene, seier Kvinen.
Meiningsmålingar i etterkant av terroråtaka i Oslo og på Utøya viser stor framgang for Arbeiderpartiet, og det mange meiner er sympatistemmer. Aarebrot meiner at også andre parti kan hauste ekstra stemmer.
– Det partiet som har ordføraren i ein kommune kan få ekstra stemmer. Har du ein ordførar som uttalar seg i ikkje-politiske saker, og seier dei rette orda får du ein sympati-effekt også ute i kommunane, seier han.