Butikkeigar låste tjuv inne i bil

– Politiet kom jo ikkje på lenge, så eg fekk putta han inn i varebilen, seier Knut Arild Sletta til NRK.no.

– Han var ganske roleg i starten. Men så køyrde eg nokre bilar inn til dørene slik at han ikkje skulle komme ut. Då prøvde han å stikke av, seier Sletta.

Den litauiske mannen hevdar sjølv at han er uskyldig.

– Eg er ingen tjuv. Eg har vore i Norge fleire gonger dei siste åra og samlar gammal skrot. Eg er iallefall ingen tjuv, seier mannen til NRK.no.

– Beklageleg

Innbrotstjuven sat i bilen frå halv to natt til fredag, til rundt 8.30 fredag morgon.

– Vi tek hand om han om ikkje alt for lenge. Vi er i ferd med å avslutte eit oppdrag. Så får vi ta hand om tjuven som sit bak i sitt eige lasterom i bilen, sa operasjonsleiar Øyvind Vellesen fredag morgon.

– Det er beklageleg at vi ikkje har politi på staden, som kan pågripe tjuvar. Men i dette tilfelle ser det ut til å vere løyst på ein glimrande måte, seier han.

Kåre Gunnar Fløystad i Aust-Agder Senterparti reagerer sterkt på at butikkeigaren måtte ta saka i eigne hender.

Lova i eigne hender

– Det er heilt feil at polititilbodet i utkantane vert bygd ned slik at folk må ta lova i eigne hender. Her har vi eit vaskeekte bevis på at auka sentralisering gir eit dårlegare tilbod, seier Fløystad til NRK.no.

– Eg kjem til å ta dette opp med partileiar Liv Signe Navarsete, seier han.

Klokka 8.30 var politiet på plass for å ta hand om innbrotstjuven.