Direktoraretet for naturforvaltning gav tysdag råd til miljøvernministeren om at sjøboder ikkje skal gjerast om til hytter.
- LES OGSÅ: Fraråder bruksendring i strandsonen
Betydeleg meirarbeid
Assisterande fylkesmann i Vest-Agder, Tom Egerhei, trur fleire saker kan ende i retten.
– Det ser eg ikkje vekk ifrå. Det eg er sikker på, dersom det endar opp med at miljøverndepartementet også vedtek det same alternativet, vil det opplagt innebere ei betydeleg meirbelasting i form av saker som må behandlast hos fylkesmannen, seier han til NRK.no.
Direktoratet for naturforvaltning fraråda i dag bruksendring i strandsona og meiner at sjøbodene må tilbakeførast til lagerbygg.
Det inneber at 400 sjøboder på Flekkerøy i Kristiansand kan måtte tilbakeførast til tradisjonelle redskapsboder.
Uønska utvikling i strandsona
- LES OGSÅ: Sjøbodkaos senker prisene
Kommunen i Kristiansand har opna for at ein skulle endre 400 sjøboder på Flekkerøy frå lager til fritidsbustader. Det er direktoratet for naturforvaltning kritiske til.
– Vi frårår ei slik løysing, fordi den vil kunne forsterke en uønska utviklinga i strandsona, sa seniorrådgiver Odd Kjærem i DN tidlegare tysdag.
– Både kommunen og fylkesmannen vil nok få eit meirarbeid knytt til gjennomføring av det alternativet. Men som eg har sagt tidlegare, trur eg ikkje det er nokon veg utanom, seier Egerhei.
Vil vere retningsgjevande
Han trur også at mange andre kommunar både på Sørlandet og resten av landet er spent på utfallet av saka.
– Det er heilt opplagt at behandlinga av saka har interesse langt utom Kristiansand kommune og Flekkerøy, i den forstand at avgjerda her vil vere retningsgjevande for behandling i tilsvarande saker i resten av landet, seier han.
