Larvik vann til slutt 30-23, etter å ha leia 13-10 til pause.
Men Vipers-spelarane var i fyr og flamme sjølv etter å ha tapt. Gjennom heile kampen var det ei fantastisk stemning i den splitter nye hallen.
– Det var heilt fantastisk. Du får eit veldig sus i magen når så mange heiar på deg, seier Michelle Brandstrup til NRK.
Fulle tribunar
Rundt 1900 publikummarar hadde funne vegen til opningskampen til Vipers i Aquarama.
– Får vi halvparten av stemninga som var i dag i dei andre kampane, så er det knallbra, seier ho.
Larvik har ikkje tapt ein seriekamp sidan 18. april 2001. Ingen i Vipers hadde veldig stor tru på at kristiansandarane skulle klare å tukte seriemeisteren. Men Brandstrup påpeikar at publikum kan vere avgjerande mot andre motstandarar i framtida.
– Dei har stor betydning. Larvik er så suverene, men i kampar som er jamne har dei veldig mykje å seie for oss, seier Brandstrup.
– Trur du på fullt hus i neste kamp laurdag?
– Vi må levere varene. Om vi ikkje klarer 1900 i kvar kamp framover, så bør vi i alle fall ha eit snitt på 600-700. Det er veldig bra, seier ho.
– Veldig gøy
Også Larvik-spelarane lot seg imponere over stemninga i Aquarama.
– Det var veldig gøy å få lov til å spele under den stemninga som var. Det er gøy at dei klarer å fylle hallen. Eg håpar dei klarer å fylle arenaen framover også, seier landslagsspelar Karoline Dyhre Breivang.
Cecilie Leganger har spelt i mange store arenaer i heile Europa. Også ho let seg imponere over stemninga i Aquarama.
– Det var kjempestemning. Det var heilt fantastisk for å vere ein norsk eliteseriekamp. Det var utruleg gøy å spele her, seier Leganger til NRK.
– Kva tykkjer du om hallen?
– Det er veldig gøy at den ligg midt i byen. I tillegg er det ein utruleg lys og fin hall. Det var godt å spele her, seier målvakta.
Vipers Kristiansand enda på 6. plass i årets eliteserie. Allereie laurdag skal laget ut i sluttspel.