10.000 får sykla nordsjørittet

Det var trangt i løypa mellom Egersund og Sandnes under rittet i år. Mange blei også plasserte på venteliste og fekk ikkje delta.

Derfor får 10.000 personar sykla det populære turrittet neste år - mot drygt 7.100 i år.

- Sykkelinteressa har eksplodert dei siste åra og behovet for nye plassar er stort, seier dagleg leiar i Nordsjørittet, Eli Orre.

Tidlegare start

Saman med Birkebeinaren er Nordsjørittet det idrettsarrangementet som har størst deltakarinteresse i Noreg.

- Nytt neste år er også at vi kjem til å forlenga arrangementet. Starten vil skje mellom ein time og halvannan tidlegare enn i år. Det betyr at dei tidlegaste kan setja seg på sykkelsetet allereie klokka 7.30 om morgonen.

- Men er 10.000 plassar nok for å hindra nye ventelister?

- Det er det talet vi har landa på i år, så får me håpa på like stor interesse i 2010 som i år.

Ventar 250 lag

Orre seier dei ventar over 250 startande lag neste år. Og løypetraséen kjem til å bli den same som i år.

- Nå kryssar vi fingrane for fint vêr, seier Nordsjøritt-generalen, som minner om at påmeldinga tek til 1. februar 2010.