– Dette er framtidas ambulansebåt, seier ein nøgd sjef i reiarselskapet Rødne.
Lars Rødne er ute i den splitter nye katamaranen på sjøen utanfor Sjernarøy i Ryfylke i Rogaland. Selskapet som driv to andre ambulansebåtar i Rogaland og Hordaland meiner at katamaran er framtida:
– Dette er verdas første ambulansebåt med to skrog. Du får mykje betre plass og båten ligg meir stødig i sjøen, dette gjer at komforten for pasientane blir betre og også arbeidsforholda for dei tilsette på båten, seier Rødne.
- Video: Populær ambulansebåt
- Les òg:
Den nye ambulansebåten som har fått namn «MS Rygervakt» har eit eige pasientrom med plass til tolv personar. Den skal nå overta drifta etter «MS Rygerstril» som nå ligg i beredskap i Austevoll.
Ambulansebåten er også utstyrt med ei vasspumpe som gjer at den kan sløkja brannar frå sjøen med hjelp av sjøvatn.
– Alt i alt så ser me på denne ambulansebåten som svært nyskapande og moderne, seier Rødne.
Nå skal båten visast fram i Stavanger, før turen går vidare til Austevoll. Her skal mannskapet ha opplæring på den nye båten i nokre veker før den overtek for den gamle ambulansebåten her.
Det var Brødrene Aa i Sogn og Fjordane som i dag leverte båten til Rødne.
VASSPUMPE: Vasspumpa og brannsløkkingsevnene til «MS Rygervakt» blir demonstrert.
Foto: Rødne
