I formannskapssalen torsdagskveld var alle Stavanger-politikarane samde; regjeringa sin asylpolitikk er for hard.
Dei ser derfor nå til Trondheim, og ber regjeringa om å endra praksisen som gjer at papirlause ureturnerbare innvandrarar ikkje får lov til å arbeida.
Måtte tilbake på asylmottak
Tidlegare i år stramma regjeringa inn reglane for asylsøkjarar som har fått endeleg avslag på søknad om opphald i Norge.
Dei papirlause blir fråtekne mange av rettane sine medan dei ventar på utreise.
Rumana Ibrahim frå Eritrea er ein av mange lagnader som har blitt råka av denne innskjerpingar.
- Les òg:
- Les òg:
- Les òg:
Etter å ha arbeidd i ti år i Stavanger og Sandnes har ho nå flytta frå eigen leilegheit til Hero sitt asylmottak i Lagårdsveien i Stavanger. Ho har blitt fråteken både skattekort og retten til å bu i eigen bustad.
– Det er vanskeleg å sitja her, men eg håper på noko betre, sa Ibrahim i eit intervju med NRK tidlegare denne veka.
Berre i Rogaland er 2000 personar i Rumana Ibrahims situasjon. Dei kan ikkje sendast heim fordi Norge ikkje har utleveringsavtale med heimlandet.
– Ei spire av håp
Det var Per A. Thorbjørnsen som leiar i kommunalstyre for levekår som føreslo vedtaket formannskapet i Stavanger i dag gjekk inn for. Han seier at dette nok i første omgang ikkje vil få konsekvensar, men håpet er ein dominoeffekt:
– Det me såg i Trondheim førre veke og nå ser i Stavanger er eit lokalt opprør mot ei regjering som ikkje innser at ikkje-returnerbare flyktningar vil ha ansvar for eige liv, seier Thorbjørnsen til NRK.no.
– Kva vil dette ha å seia for situasjonen til Rumana Ibrahim?
– Eg er realist og meiner ikkje at det som har skjedd så langt er tilstrekkeleg. Men me har gitt Rumana ei spire av håp. Tidlegare var ho i ein håplaus situasjon, seier venstrepolitikaren.
Ordlyden i vedtaket formannskapet Stavanger kommune i kveld gjorde er som følgjer:
«Stavanger formannskap ber regjeringen legge forholdene til rette for at ureturnerbare papirløse flyktninger kan arbeide lovlig og betale skatt inntil kjent utreisedato.»