Den eine som er sikta og varetektsfengsla etter tolv år gamle Olav Hovda blei påkøyrd og drepen i Lalandsvegen i Klepp har anka fengslinga.
Medan anken til den 43 år gamle mannen blir behandla, må han i dag inn til nytt avhøyr med politiet.
– Me har ein del spørsmål
– Me har snakka med han tidlegare i saka, men nå vil me ha eit nytt avhøyr etter fengslinga, seier lensmann i Klepp Hans Kyllingstad.
– Kva forventar de å få ut av avhøyret?
– Me har ein del spørsmål som me vil stilla han i dag, så får me berre sjå om han vil svara. Kva me forventar har eg ingen kommentar til.
- Les òg:
Lensmannen reknar med at anken til den sikta vil få ei avgjersle i dag eller i morgon.
Ektefellen til 43-åringen sit også varetektsfengsla, men har ikkje anka. Dei har begge medieforbod den første veka.
Jobbar med mobilspor
Mannen meiner at mobilspor og nettrafikk vil bevisa at han ikkje har vore i bilen. Lensmannen seier dei er i gang med å sjekka desse spora.
– Me jobbar med saka, me treng ei stund til for å få behandla alle opplysningane me sit på, seier han.
Men det er ikkje berre dei sikta politiet vil konsentrera seg om.
Fleire vitne inn til avhøyr
– Me held fram med å etterforska saka for fullt. Me skal også gjera avhøyr av vitne som me meiner er viktige for saka.
– Kva slags vitne er dette?
– Nå er det vitne som me håper kan sei litt om personane, bilen og rørslene me veit har skjedd i og rundt Lalandsvegen. Også opplysningar om kva som har skjedd i og rundt bustaden til dei to.
– Har de ein teori om korleis hendingsgangen har vore?
– Me har vel ikkje sagt at me har ein teori, men me har nå eit godt bilete av kva som har skjedd, så får me sjå kva desse avhøyra gjer oss i løpet av dagen.