Fransk siger i Lysebotnbakken opp

Franske Jean Marc Gaillard vann seniorklassa for herrar i Lysebotnbakken opp torsdag ettermiddag. Han skøyta opp den bratte bakken på 30 minutt og 22 sekund. Nummer to blei tyske Franz Göring, medan Martin Johnsrud Sundby blei beste nordmann på tredjeplass, vel 40 sekund bak vinnaren.

I kvinneklassa blei det derimot norsk siger, der Martine Weng var første kvinne til Øygardsstøl.

Norgescuprennet på rulleski i Lysebotn er nok ei av dei største kraftprøvane denne sommaren. Store delar av det norske landslaget, samt fleire andre i verdstoppen skøyta seg veg frå Lysebotn til Øygardsstøl.

Til saman er løypa på 7,5 kilometer, der 6 kilometer er stigning. Deltakarane skal opp 640 høgdemeter, og gjennom 27 hårnålssvingar.

På førehand var det knytta stor spenning til duellen mellom Dario Cologna og Petter Northug jr. Det var tilslutt Cologna som trakk det lengste strået. Han kom inn som nr. fem, medan Northug jr. blei nummer ni.

Mange i verdstoppen

I tillegg til over 100 barn og unge, deltok nokre av dei beste langrennsløparane i verda, mellom anna:

Frå Noreg: Petter Northug jr., Eldar Rønning, Martin Johnsrud Sundby, Simen Østensen, Tord Asle Gjerdalen, Marthe Kristoffersen.

Frå Frankrike: Cyril Miranda, Simon Fourcade, Vincent Jay, Martin Fourcade, Marie Laure Brunet.

Frå Sveits: Dario Cologna, Curdin Perl.

Frå Russland: Nikolai Pankratov.

Frå Tyskland: Franz Göring, Josef Wenzl.