KrF i Notodden foreslår gratis barnehage og SFO til barn nummer tre for å snu den negative utviklinga i folketalet i kommunen.
Forslaget er teke med i partiprogrammet til KrfFi Notodden kommune.
Vil bli barnevennleg
Forslaget går ut på at KrF vil gje det tredje barnet i ein familie gratis barnehage og skulefritidsordning.
- Barn nummer to skal få 50 prosent syskenmoderasjon, seier Tor Andre Ljosland som er ordførarkandidat for Notodden KrF.
Ljosland kjenner ikkje til at dette er foreslått eller gjennomført i andre kommunar, men meiner gjennomføringa rent praktisk er enkel.
- Viss kommunen sørgar for å bli barnevennleg kan det føre til auke i folketalet, seier Ljosland.
Han meiner kommunen vil få tilført pengar frå staten som vil dekke delar av utgiftene.
Får politisk støtte i kommunen
Bjarne Bakken som er ordførar for Ap i Notodden kommune synest forslaget er konstruktivt.
- Eg kunne godt tenke meg å vere med på å støtte eit slikt forslag. Største utfordringa for kommunen er å auke folketalet, seier Bakken.
Nils Bjørnflaten er formann i Notodden Frp. Han meiner kommunen må sjå på den økonomiske sida.
- Viss vi får økonomiske overføringar for staten som tilsvarar utgiftene vil vi sjølvsagt støtte dette, seier Bjørnflaten.