I dag lanserte statsminister Erna Solberg og kunnskapsminister Torbjørn Røe Isaksen strategien.
Les meir om det her:
Leiar i Utdanningsforbundet i Telemark, Harald Johansen, seier at noko er bra, men at det er mykje som manglar. Han peikar særleg på at regjeringa har gløymt dei tilsette i barnehagane når det gjeld vidareutdanning.
– Det blir ikkje sagt nokon ting om kompetanseheving og vidareutdanning i barnehagen, Regjeringa snakkar om skulen, og den har ei rekrutteringskrise, seier Johansen.
Vil mangle lærarar
Han viser til at det i 2020 kjem det til å mangle 11.000 lærarar, og vil ha ei styrka rekruttering inn i læraryrket.
– Regjeringa foreslår noko, men eg meiner andre tiltak vil vere betre til å styrke rekrutteringa, seier Johansen.
Utdanningsforbundet vil ha fleire lærarar inn skulen. Johansen meiner det ville ført til betre læring og gjere det meir attraktivt å arbeide i skulen.
– Vi veit at det er viktig å sjå kvar enkelt elev for å få til ei god læring, men sjansen for å få til det blir vanskelegare når elevgruppene berre blir større, seier Johansen.
Dessutan peikar han på at andre yrkeskategoriar kunne ta seg av alle dei oppgåvene som lærarane blir pålagt å gjere.
Blant anna vil Johansen ha fleire helsesystrer i skulen.
– Dette er det gitt politiske signal om, men eg finn ikkje igjen noko av det i meldinga som kunnskapsministeren la fram, seier Johansen.
Noko er positivt
Kunnskapsminister Torbjørn Røe Isaksen vil sende tusenvis av lærarar tilbake på skulebenken. Det kostar ein milliard kroner i året.
– Blir det betre lærarar av det?
– Dette er noko av det som er positivt i meldinga. Vi veit at kommunane ikkje har økonomi til å ta seg av denne vidareutdanninga åleine, seier Johansen.
Han viser til at vidareutdanning av lærarar i matematikk og realfag ikkje kostar noko for kommunane.
– Her dekker staten og læraren sjølv rekninga. 75 prosent av staten og 25 prosent av den enkelte læraren, seier Johansen.
Han meiner det bør stimulere kommunane til å satse på vidareutdanning av lærarar.
Einsidig satsing
– Regjeringa er opptatt av å skape ein skule der elevane skal lære meir. Vil dei det etter det som kom i lærarløftet i dag?
– Fagkompetanse er viktig for å kunne formidle kunnskap. Men det er eit einsidig fokus på realfag, også når det gjeld opptaket til lærarskulen, seier Johansen.
Han spør om det er nødvendig med karakteren fire i matematikk for å undervise i musikk, vere lærar i formgiving eller historie, norsk og engelsk.
– Eg meiner det er feil politikk.
Johansen trur mange lærarar i Telemark er einig med han.
– Eg trur det er ei lett risting på hovudet, og at lærarane meiner dette ikkje er svaret på det vi treng for å skape ein betre skule i framtida, seier Johansen.