Dei nye målingane Naturvernforbundet har gjort, syner at det er meir kvikksølv i fisken frå Kragerø, enn styresmaktene tidlegare har rekna med.
I enkeltindivid har Naturvernforbundet funne konsentrasjonar som er fem gonger større enn den kosthaldsgrensa styresmaktene har sett.
- Sjå også: Kvikksølv i krabbe i Vatsfjorden
– Krev kartlegging
Nå krev Lars Haltbrekken i Naturvernforbundet at styresmaktene finn årsaka.
– Vårt krav er ei grundig kartlegging, og deretter ei opprydding. Dette er miljøgifter som er farlege både for miljøet og for folk si helse, seier han til NRK.no.
– Åtvaringa kom 40 år for seint
I fjor åtvara Mattilsynet gravide mot å ete torsk frå Kragerø. Naturvernforbundet meiner åtvaringa kom 40 år for seint.
– Styresmaktene manglar oversyn over forureinga, og fylgjene den får for natur og menneske, seier Haltbrekken.
Naturvernforbundet har orientert styresmaktene om dei nye funna. Hilde Keilen i Klima- og forureiningsdirektoratet seier ho vil be om eit møte med forbundet for å drøfte undersøkinga.
Breiare utgreiing
Henriette Fluer Vikre frå Framstegspartiet er varaordførar i Kragerø. Ho trur ikkje det er fare for Kragerø sitt gode namn og rykte.
– Men det er klart at vi må ta målingar som syner for mykje miljøgifter i torsk på alvor. Vi treng ei grundig kartlegging av situasjonen, seier ho.
