– Det oppleves veldig dramatisk og det er nesten uverkeleg at noko slikt skjer i Namsos, seier ordførar Morten Stene etter knivstikkinga ved Namsos bo- og servicesenter onsdag føremiddag.
Tatt og sluppe fri
Det var like før klokka 1000 ei kvinne i trettiåra blei funnen knivstukken ved Namsos bo- og servicesenter.
Kvinna er ifølge St. Olavs Hospital livstrugande skadd og tilstanden er ustabil.
LES OGSÅ:
Ei kvinne i femtiåra blei tatt av politiet onsdag føremiddag. Etter nærmare undersøkingar blei ho sluppen laus igjen.
– Etter samtale med vedkommande og andre opplysingar i saka, ser vi ikkje på ho som gjerningspersonen som står bak knivstikkinga, opplyser Nord-Trøndelag politidistrikt i ei pressemelding.
Politiet har beslaglagt ein kniv frå åstaden. Dei har også søkt om hjelp frå Kripos både til taktisk og teknisk etterforsking.
(Artikkelen held fram under bildet)
Tøft for dei involverte
I blokk A i bufelleskapet bur det i dag 23 personar. Dette er rusmisbrukarar, psykiatriske pasientar og funksjonshemma.
Dei fleste av bebuarane blei evakuerte fordi politiet var redde for at gjerningspersonen også var inne i bygget. Dei blei plassert i ein buss og køyrd til ein trygg stad.
Nokon kunne av ulike årsaker ikkje evakuerast frå bygget. Dei blei sikra i ein del av omsorgssenteret sammen med personell.
– Tilsette og bebuarar ved Namsos bo- og servicesenter opplevde situasjonen som dramatisk. Det at ein bebuar blei skadd, politi og stor oppstandelse gjer at dette blir ei oppleving som set spor i folk, seier helse- og omsorgssjef i Namsos kommune, Morten Sommer.
Møte med dei tilsette
Utover kvelden har dei tilsette hatt møte med kriseteamet i Namsos kommune.
– Dei tilsette vil få høve til å dele erfaringar og opplevingar dei har hatt gjennom dagen, seier Sommer.
Bustadane i omsorgssenteret blir ikkje opna igjen i kveld og kommunen jobbar med å skaffe alternativ innkvartering for dei av brukarane som treng det.
– Mange av dei pårørande har tatt kontakt og sagt at dei tek heim sine. Det er vi takksame for. Dei dette ikkje er eit alternativ for, blir innkvarterte på hotell i Namsos, seier Sommer.
Roleg og beherska
Personalet ved Namsos bo- og servicesenter har ifølge helse- og omsorgssjefen takla saka veldig roleg.
– Vi er veldig glade for den måten personalet har handtert saka på. Det har gått veldig stille for seg og vi har ikkje hatt nokre reaksjonar frå andre, seier Sommer.
Først i torsdag morgen blir det klart kva som skjer vidare.
Politiet i Nord-Trøndelag har oppretta eit telefonnummer som pårørande kan ringe. Nummeret er 74 12 10 75.