VIL HA RENN: Prosessfullmektig Tine Larsen og Roar Aspaas frå Meråker Aktivitet.
Laurdag skal sommarskirennet i Tour de Trøndelag etter planen sparkast igong i Meråker. Men rennet kan bli avlyst i siste liten, dersom retten meiner at aktiviteten øydelegger for reinbeitet.
– Skremmer vekk reinen
– Problemet med rennet er at reinen kan flykte langt avgarde og ikkje komme tilbake til viktige beiteområde på lenge, sa prosessfullmektig Knut Henrik Boehlke i Stjør- og Verdal tingrett i dag.
Han representerer Feren reinbeitedistrikt, som vil stoppe rennet i Tour de Trøndelag.
– Eliteskilauparar skal få leike seg, men ikkje når det går ut over reindrifta, sa Boehlke i retten.
– Ikkje rein i dette området
Arrangør Meråker Aktivitet meiner på si side at sommarskirennet vil vere uproblematisk for reindrifta.
– Det er ikkje sett rein i det aktuelle sommarbeitet på mange år. Det vil òg vitne stadfeste i retten, sa Tine Larsen, prosessfullmektig for Meråker Aktivitet i retten i dag.
Områdestyret for reindriftsforvaltninga i Nord-Trøndelag vedtok først at skirennet skulle stoppast, men endra vedtaket etter at Meråker Aktivitet klaga.
Har prøvd å bli einige
Partane har freista å komme til ei minneleg løysing. Prosessfullmektig Boehlke foreslo før helga at skirennet kunne gå utan bruk av ATV og speakerteneste, samt at Meråker Aktivitet betaler 100.000 kroner i kompensasjon.
Meråker Aktivitet har avvist dette, men tilbyr å betale meirutgifter i samband med gjeting dersom reinen er i området under skirennet.
– Dette viser ei manglande forståing frå Meråker Aktivitet, sa prosessfullmektig Boehlke i retten.
I morgon føremiddag vil retten avgjere om rennet blir avlyst eller ikkje. Ein eventuell anke frå nokon av partane vil kome opp for seint til kunne å gjere nokon forskjell.
