I dag er siste sjanse til å ordne det ein treng til bunaden 17. mai. Ved Husfliden i Trondheim er det fullt kjør.
– Mange gløymer
– Folk har gløymt å sjekke skjorta si frå 17. mai i fjor, og ser plutseleg at den er slitt, gul eller holete. Og så er det mange som merkar at bunaden har krympa i skåpet sidan i fjor, seier dagleg leiar Guri Anne Ustad spøkefullt.
- LES ÒG: Flekkfjerning på finstasen
Så seint som i dag har desperate folk teke kontakt for å høyre om Husfliden kan ordne på bunaden i siste liten. Det er dessverre for seint.
– Vi har vore fullbooka i to månader allereie, seier Ustad.
Manglande tilbehør kan dei likevel hjelpe til med. Ein jamn straum av kundar kjem innom for å kjøpe mansjettknappar, strømper og søljer til nasjonaldagsfeiringa.
Stryketips
Ustad fortel at ho sjølv plar vere seint ute med å stryke bunadsskjorta si. I år har ho derimot sørga for at skjorta allereie heng klar og nystroken i skåpet.
– Eit godt tips er å dynke ho i vatn i dag og stryke ho medan ho er fuktig. Så heng du ho opp og stryk ho igjen i morgon. Då er ho kjempefin til 17. mai, lovar Ustad.
For dei som har kjøpt seg nye bunadssko er det kanskje like viktig å få tips for å unngå gnagsår.
Falske bunader
Køa er lang for å skaffe seg ekte vare frå Husfliden. Framsida på Dagbladet i dag kunne på den andre sida fortelje om piratkopierte bunader som er produsert i utlandet. Ustad er klart kritisk til slike kopiar.
– Vi er opptekne av tradisjonane. Handtverket skal vere så norskt som mogleg. Vi likar ikkje falske bunader, seier ho.