Arvandor var eit av åtte band som var plukka ut til å spele på det store musikkbransjetreffet Blest på Nordfjordeid i helga.

Dei var eit av dei første banda som fekk spele på scena i Gymmen fredag kveld, og med sin heilt særeigne stil imponerte dei publikum stort.

(Artikkelen held fram under biletet)

PÅ NRK: Måndag morgon kan du høyre intervju med Arvandor. Her intervjua av Stian Sjursen Takle.

Foto: Geir Bjarte Hjetland

Delar på vokalrolla

Arvandor har valgt ein modell der dei delar på vokalistrolla, noko som framstod som ei spennande løysing.

– Målet er at alle skal vere med og synge, fortel Arvandor, som er sett saman av Marianne Rønneseth, Irmelin Fimreite, Kristianne Gimmestad Gule og Anette Lekva.

• LES OGSÅ: Musikkbransjen samla i helga

Fekk fram nye sider

Laurdagen, derimot, var det stil og steming som var i fokus. Først fekk bandet profesjonell styling, og nokre timar seinare stod fotosession for tur.

To erfarne fotografar fekk fram Arvandor-jentene sin stil i kameraruta.

– Dette var veldig kjekt og spennande. Ein fin måte å få fram nye sider av seg sjølv, seier Irmelin Fimreite frå Hyllestad.

Ho er ein av i alt tre jenter i bandet frå Hyllestad i Ytre Sogn, medan Kristianne kjem frå Sandane.

Viktig å møte andre

No satsar dei vidare på bandet, sjølv om dei fysisk sett er geografisk spreidde frå Bergen til Naustdal.

For Arvandor var det stas å få vera med på Blest på Nordfjordeid.

– Det å møte andre i musikkbransjen er viktig, og såleis var Blest ein strålande arena, meiner Arvandor-jentene.

(Artikkelen held fram under biletet)

ALEINE PÅ SCENA: Iselin Løken Solheim serverte stemningsfulle tonar frå scena i Gymmen på Nordfjordeid.

Foto: Geir Bjarte Hjetland

Iselin utan band

Men det var slett ikkje berre Arvandor som fekk synt fram at det rører seg blant jentene i musikkbransjen i Sogn og Fjordane.

Iselin Løken Solheim er i ferd med å byggje opp ei karriere som singer / songwriter, og stod mutters aleine på scena i Gymmen på Nordfjordeid.

– Det var spennande og litt nytt å stå aleine på denne måten utan å ha med bandet, men det var ei flott oppleving, meiner Iselin.

Ho satsar no vidare på musikken med base i Oslo, der ho kombinerer musikkarieren med jobb på Moods of Norway.

Stor sans for Blest

Dei åtte banda som var plukka ut til årets Blest serverte musikk frå pop- og rocksjangeren.

Men styreleiar i Sogn og Fjordane folkemusikklag, Synnøve Bjørset, meiner likevel at arrangementet bør vere kome for å bli.

LIKTE BLEST: Øyvind Heggheim frå bandet Drusar og Synnøve Bjørset frå folkemusikklaget trivdes godt i sola på Nordfjordeid.

Foto: Geir Bjarte Hjetland

– For meg som er djupt engasjert i folkemusikken, er det også stas å kome hit og sjå at det gror godt i musikkmiljøet ellers også. Men på sikt bør kanskje Brak vurdere å ta nokre grep som gjer at ein enno større del av det rytmiske feltet blir representert både på scena og blant delegatane, meiner Bjørset.

Må sjå over grensene

Ei rekkje arrangørar var og tilstades på Blest. Mellom dei var Alvin Vestrheim frå suksessfestivalen Bygdalarm i Øystese i Hardanger.

BYGDALARM: Alvin Vestrheim har vore med og skapt kjempesuksessen Bygdalarm i Øystese i Hardanger.

Foto: Geir Bjarte Hjetland

– For meg som arrangør er Blest ein viktig møtestad. Det å knyte kontaktar og byggje nettverk er heilt avgjerande for suksess, meiner Vestrheim.

Han meiner at det er viktig at dei lokale musikkulturane på Vestlandet ikkje heng seg for mykje opp i fylkesgrensene.

– Bygdekulturen er like sterk i Eid som i Hardanger, og vi har mykje å lære av kvarandre. Ikkje minst i det å vere stolte over kvar vi kjem frå og det vi klarer å skape, meiner Bygdalarm-sjefen.