Post i Selje

På Eide var det postopneri, og der vart det liggjande i lang tid, m.a. fordi prost Wilhelm Fredrik Koren ikkje ville ha det flytta til sjølve Selje. Først i 1874 vart postkontoret flytta frå Eide til sentrum.

Berre tre postopneri i Nordfjord

Heilt fram til 1830-talet var det berre tre postopneri i Nordfjord: Rebakken i Breim, Kirkhorn i Hornindal og Eide i Selje. Postsambandet til Eide sørfrå kom via Sauesund ved Askvoll, der det var ein korrespondanse for kystområda til den postruta som fylgde Den Trondhjemske Postvei litt lengre inne i landet i Sunnfjord. Frå Einehaugen ved Kjødepollen gjekk postruta vidare nordover gjennom Vanylven via embetsgardane i Leikanger på Gurskøy til Borgund/Ålesund og Ørskog.

Korrespondanse med indre Nordfjord

Frå Eide gjekk det også ei postrute over Berstadeidet til Rimstaddalen og Bryggja. Derfrå vart posten rodd innover til embetsgardane i Nordfjord. I Utvik kommune hadde denne ruta ein korrespondanse med postruta som gjekk nord-sør gjennom innlandsbygdene i Fjordane, langs Den Trondhjemske Postvei. Seinare kom det også ei innlandsrute for posten frå Reed i Breim–Ryssfjøra-Hunvik-Hundeide-sorenskrivargarden på Leikvin/Løkja og vidare til Sunnmøre over Hjelmelandsdalen-Bjørkedalen-Volda.

– Les meir om Den Trondhjemske Postvei m.a. under kommunane Gloppen, Stryn og Hornindal.

Pilegrims- og postvegen over Berstadeidet

Frå Berstad og over Berstadeidet er det framleis tydelege spor etter den gamle postvegen: Fleire stader finn ein steinheller til å gå på, restar etter bruer, i bratt skråbakke er den greven inn i bakken med den faste breidda som ein offentleg rideveg skulle ha: 2 alner – d.v.s. 1,26 meter.
Også pilegrimar på veg til klosteret på Selja nytta Berstadeidet som ferdsleveg. På 1920-talet gjekk forfattarinna Sigrid Undset denne vegen saman med historieprofessor Francis Bull på ein tur til Selje kloster.
Då vegen over Maurstadeidet vart opna i 1866, vart postruta nord-sør lagt etter denne vegen, og kontoret på Eide miste sin status som knutepunkt i postgangen. I staden fekk no postruta innover Nordfjord korrespondanse på Einehaugen på Kjødepollsida, gjekk via Åheim og over Maurstadeidet til Bryggja og derfrå med robåt innover Nordfjord heilt til Utvik.
Ein legendarisk postførar på 1800-talet var Jakob August Pisani , ein mann med italiensk opphav som tente som postførar både i Nordfjord og i indre Sogn.

Lokale postkontor og brevhus

Postkontor i Selje kommune, ordna etter startår:
Eide 1823
Seljevågen i Selje 1874
Stadlandet 1877
Årsheim 1878
Ytre Stadlandet 1890
Barmsund 1892
Drage 1893
Flatrake 1910
Stadvågen 1945
Barmen 1955

Det var også såkalla brevhus i Ervik, Årvik, Fløde, Kjødepollen, Vetrhus og Håvik.