Svelgen Turn- og Idrettsforening (STIF) vart skipa i 1930, og har sidan vore ein sentral organisasjon i industribygda.
Kåre Kjølberg var formann dei sju første åra. Laget fekk 67 medlemmer frå starten. Dameturn var ei populær grein heilt frå starten, og turnmiljøet i Svelgen var kjent som eitt av dei fremste i fylket. Høgste medlemstal hadde STIF i 1980, med 688 medlemmer, og laget har på sitt beste hatt 11 særgrupper i aktivitet.
Framståande idrettsprestasjonar frå STIF
Den fremste idrettsutøvaren frå laget har vore ti-kjemparen Svein Frøyen, som i 1950 vann bronse og 1951 sølv i NM. Han var aktuell kandidat til OL i Helsinki i 1952, men vart skadd før kvalifisering.
Elles har symjarane Thor Åge Midttun, Idar Eikeland og Arne Helle representert Noreg i landskampar. Det same har fotballspelaren Marit Renate Midthjell.
I seinare klubbar har tidlegare STIF-medlem Reidulf Førde gjort seg gjeldande på nasjonalt plan i friidrett, Arild Førde i fotball og Unn Kvendseth i volleyball.
Den fremste prestasjonen innan lagidrett var då herrelaget i volleyball vart Noregsmeister i 1979. I 1996 arrangerte STIF NM i volleyball for jenter og gutar opp til 18 år.
Dei fleste anlegga er bygde med stor dugnadsinnsats frå medlemene.