Skular i Vågsøy

Det første faste skulehuset vart truleg bygd i Røysa på Raudeberg ca. 1865. På den tida var det omlag 12 veker skuletid årleg.

Skram skole i Måløy

I 1881 innreia Hans Kvalheim (Skule-Hans) skulerom i eige bustadhus på Skram. Seinare vart det bygd skulehus på Midtgård, og i 1920 eit nytt stort skulebygg på Skram.

Selje Sløyd og Arbeidsskule

starta 1885 etter mønster frå Holmøy Arbeidsskule. Denne ambulerte, og heldt m.a. til i Osmundsvåg og Skram. Nedlagd 1909.

Første kvinnelege lærar

i fast post var Magda Torjussen på Skram (Måløy) 1901. Skram fekk fast skulehus 1897.

Bokmålet i skulen

I 1919 avgjorde ei folkerøysting i Sør-Vågsøy at skulemålet i heile kommunen skulle vere nynorsk (256 for nynorsk - 153 for bokmål). Skulemålet i Måløy har likevel vore bokmål heilt sidan 1928, med parallellklassar i nynorsk nokre år på 1930-talet. (Sjå elles distriktslege Einar Strand under "Helsestellet i Vågsøy".)

Per Drage. (©Fylkesarkivet)

Måløy Tekniske Aftenskole

vart starta i 1911 av ingeniør Per Drage. Den heldt til i Johnsens Hotell like ved Torget i Måløy sentrum, og tok inn 10-15 elevar i kvart kull. Elevane kom frå Måløy og bygdene innover Nordfjord. Kursa var halvårlege, og forutan elektrofag vart det undervist i matematikk, projeksjonsteikning, norsk og engelsk. Per Drage stod sjølv for undervisninga, av og til assistert av sonen Arnulf Drage. Den private skulen var i drift til fram under 2. verdskrig.

Måløy kommunale realskole

vart skipa 1913.

G. Kragseths Handelsskole

starta i Måløy i 1931. - Sjå G. Kragseths Handelsskole.

Realskule på Raudeberg

På Raudeberg vart det sett i gang realskule i krigstida. Den vart driven i 5-6 år. Deretter vart elevane sende til realskulen Måløy med fri skuleskyss.

Moldøens Middelsskole

- sjå Måløy kommunale realskole.

Privat arbeidsskule

M. Endal starta 1936 ein privat arbeidskule i Måløy. Han dreiv skulen til 1952.

Linedelt ungdomsskule

Vågsøy innførte 9-årig linedelt ungdomsskule i 1965, samstundes som den kommunale realskulen i Måløy vart lagt ned. Skulen fekk frå starten eige bygg på Gotteberg, der det også var gymnastikkhall og symjebasseng.

Skavøypoll

fekk skulehus i 1896. Grenda Kulen freista fleire gonger mellom 1911 og 1923 å verte eigen krins, men fekk berre godteke ein vinterskule i åtte veker i 1919. Nytt skulehus vart bygt i 1954, og då vart også tidlegare Saltkjelen krins ved Ulvesundet sentralisert til den nye skulen.

Våge (Vågsvåg)

fekk skulehus i 1905. Etter motstand i grenda vart også Oppdedal krins lagt til skulen i Vågsvåg i 1920. Det vart bygt ny skule i Vågsvåg kring 1960.

Kvalheim

fekk skulehus i 1915.

Holevik

fekk skulehus i 1917.

Saltkjel krins

(omfatta Trollebø, Saltkjel og Hagevik) fekk skulehus i 1917, men vart lagt ned og sentralisert til Skavøypoll i 1954.

Kråkenes

fekk skulehus i 1917.

Halsøyr

fekk skulehus i 1917, men krinsen vart slegen saman med Raudeberg i 1938.

Silda

fekk skulehus i 1920.

Refvik

fekk skulehus i 1922. Bygda hadde felles skule med Vedvik frå 1902.

Vedvik

fekk eige skulehus i 1922. Nytt skulehus vart bygt i 1956. Etter nedlegging av krinsen på 1960-talet vart bygget nytta eit par år som konfeksjonsfabrikk av eit Bergens-basert tekstilselskap. Seinare vart Vedvik teken opp att som skulekrins, men vart lagt ned i 2002 og borna overførte til Raudeberg.

Tytingvåg

fekk skulehus i 1927, og skulen der var i drift til midt på 1980-talet. Byggeår for andre skulehus i bygder som tidlegare høyrde til Davik kommune, vantar (Det gjeld Nave, Maurstad, Rimstad, Totland, Almenningen og Gangsøy).

Dagens kommunale skular:

Vågsøy Ungdomsskole, Måløy 8.-10. klasse – 227 elevar
Bryggja skule 1.-7. klasse – 63 elevar
Holvik skule 1.-7. klasse – 38 elevar
Kvalheim skule 1.-7. klasse – 17 elevar
Raudeberg skule 1.-7. klasse – 111 elevar
Skavøypoll skule 1.-7. klasse – 144 elevar
Skram skole 1.-7. klasse – 204 elevar
Våge-Oppedal skule 1.-7. klasse – 23 elevar

Skulenedleggingar

I 2002 vart Husevåg skule lagd ned og elevane overførde til barneskulen i Måløy (Skram skule). Vedvik skule vart lagd ned samstundes, og elevane overførde til barneskulen på Raudeberg.

Montessoriskule på Nordstranda

Også Nordstranda skule i Almenningen vart lagt ned som kommunal skule, men her skipa foreldra privatskule driven etter "Montessori"-prinsippet. Skulen tek også inn elevar for andre krinsar i kommunen, og har 19 elevar.

Vaksenopplæring og kulturskule

Kommunen driv elles Vaksenopplæringssenter og Musikk- og kulturskule i Måløy.

Måløy Yrkesskule

- sjå Måløy Vidaregåande Skule.

Måløy Vidaregåande Skule

Måløy Yrkesskule starta 1953. Yrkesskulen gjekk seinare inn i Måløy Vidaregåande Skule.

Nordfjordhallen

I 2001 vart Nordfjordhallen opna like ved Måløy Vidaregåande Skule på Tennebø. Dette er den største storhallen for idrett i Nordfjord.

Studiesenteret i Måløy

Grunnlagt 1986 av Turid Breidalen, og i Folkeuniversitetets regi.