|
Førde volleyballklubb trenar i Førdehuset. (Foto: NRK) |
I samband med at Førde vart utpeika som vekstsenter i 1965, starta kommunen planlegging av eit idretts- og samfunnshus.
Etterkvart kopla tunge statsinstitusjonar seg på, og ideen om Førdehuset tok form.
Førdehuset stod ferdig i 1976, og vart eit pionerprosjekt i regional kultursatsing som vekte internasjonal merksemd. På eit areal på vel 12000 kvm., og med felles inngang, kunne ein finne konsert- og utstillingssalar, kino, fylkesbibliotek,
Sogn og Fjordane Teater, kunstnaratelier, vevstover, sakralrom for kyrkja, NRKs avdelingskontor, idrettshallar, symjehall. I tillegg to store idrettsbaner utandørs.
Etter fleire kulturkonferansar, store folkemøte og utgreiingar, gjekk både Riksteatret, Riksgalleriet og Rikskonsertane inn for å etablere lokale kunstnargrupper i Førdehuset.
NRK hengde seg på med Smeland-utvalets framlegg om nærradio i Førde, som etter ein ”modningsprosess” enda opp med avdelingskontor og seinare (1979) eige distriktskontor
i Sogn og Fjordane;
NRK Sogn og Fjordane.
Av dei andre kulturelle ”desentraliseringsideane” kring Førdehuset var det berre regionteater-idèen som vart realisert med
Sogn og Fjordane Teater i 1977. Kunstskulen har basert drifta på tilreisande biletkunstnarar som lærarar. Region-musikar-ordninga vart skipa nokre år seinare, og etter ein annan desentralisert modell.
I 1996 vart Førdehuset utvida med 5000 kvm. - m.a. ein storhall for idrett og symjehall med vass-sklie. Sogn og Fjordane Teater fekk eigen teatersal, og Sogn og Fjordane Kunstnarsenter flytta frå kjellarlokale i Røde Kors-bygget til nye utstillingslokale i Førdehuset. Førdehuset er eit av dei største kulturbygga i landet, med 17000 kvadratmeter golvflate.