Forretningsfamilien Hjelmeland

Andreas Hjelmeland

flytta etter nokre år som murmeister i Bergen til Førde i 1949, og bygde på få år opp den største entreprenørforretninga i Sogn og Fjordane. Første store oppdraget i Førde var bygging av Førde Meieri som stod ferdig i 1954. I 1950 bygde han sitt første forretningsbygg i sentrum (der m.a. Dressmann og Fretex-butikkar har halde til), og i 1960 forretningsbygget Førde Varehus, som seinare har vorte utvida mange gonger og husar kommuneadministrasjonen i byen. I 1968 overtok Andreas Hjelmeland alle aksjane i den kombinerte møbel- og utstyrsforretninga Førde Varehus som til då hadde vorte driven av Audun Hukset.

Eige fly

I 1957 kjøpte Andreas Hjelmeland som den første i fylket eige fly, og i 1966 skipa han Førdefly som med sjøfly m.a. dreiv avisflyging og charterflyging med daglege ruter på Bergen (sjå samferdsle). Andreas Hjelmeland bygde eigen hangar og sjøflyhamn på Øyrane. Hjelmeland spela ei sentral rolle då småflyplassen på Øyrane vart bygd i 1971, og hangarbygget tente som stasjonsbygning med kontrolltårn for småflyplassen heilt til den nye flyplassen på Bringeland vart opna i 1986.

Andreas Hjelmeland bygde også lager og forretningsbygg i Halbrendslia (noverande Førde Bygg AS) og forretningshuset Fokusgården i sentrum sør i 1972. Andreas Hjelmeland var i lang tid den største entreprenøren i Sunnfjord og har bygd ei mengd store forretningsbygg, fabrikkar og skular kringom i heile fylket.

Andreas har overlate drifta av eigedomane til sønene Frank Hjelmeland f. 1951 og Arle Hjelmeland f.1958. Frank har m.a. utvida Førde Varehus mykje sidan han tok over, og Arle bygde i år 2000 det karakteristiske restaurantbygget Pikant ved Langebrutorget i sentrum sør.

Les meir om:

· Andreas Hjelmeland
· Fritz Hjelmeland

· Gunnar og Finn Hjelmeland

· Gunnar Hjelmeland
· Finn Hjelmeland