Jølster Kommunale Automobilselskap

Skulle drive varetransport

Alt i 1912 drøfta jølstringane skiping av eit eige rutebilselskap som skulle drive varetransport på strekninga Vadheim-Sandane. Dei tenkte seg eit selskap som skulle heite Sønd- og Nordfjord Automobilselskap. Fjordenes Automobilselskap såg fåren for konkurranse, og baud seg til å skaffe jølstringane to lastebilar til slike ruter.

Jølstringane med eigne planar

Men jølstringane var alt godt i gang med eigne planar, baud nabokommunane å teikne aksjar i Sønd- og Nordfjord Automobilselskap, men fekk liten respons. Fylkesmannen la seg bort i striden, og det enda i første omgang med at Fjordenes Automobilselskap skulle syte for varetransporten til Jølster. Men rutene hadde liten kapasitet, og jølstringane var svært misnøgde med tilbodet.

Greip sjansen

Då staten i 1918 lova støtte til lokale vareruter, nytta difor jølstringane høvet til å skipe sitt eige kommunale bilselskap. Jølster Kommunale Automobilselskap vart skipa i 1919.

Avslag

Men fylkesmann Ingolf Christensen ivra sterkt for store, interkommunale ruteselskap, og avslo søknaden frå Jølster om rutekonsesjon. Fylkesmannen let også vere å sende jølstringane sin søknad om statsstøtte vidare. Jølstringane irriterte seg sterkt over dette, og gjennom ein utvandra jølstring i Oslo fekk dei på eiga hand lagt saka fram for arbeidsminister Olsen-Nalum. Då han høyrde at jølstringane alt hadde kjøpt bil, og at det dreia seg om ei rein lokal varerute til eiga kommune, gav han konsesjon, og overprøvde såleis den mektige fylkesmann Christensen. Lastebilen, av merket Republik og med 2,5 tonns lasteevne, hadde første ruta 22. juli 1919.

Kortvarig billag

Det kommunale billaget vart eit kortvarig mellomspel. Påskunda av fylkesmann Christensen vart det lagt fram ein stor transportplan for heile fylket i 1919. Her gjekk ein sterkt inn for større, offentleg eigde ruteselskap. Dei to ”innlandskommunane” Jølster og Gaular, som kvar for seg hadde stort behov for lastebilruter ned til fjorden, vart med i skipinga av Firda Billag i 1920. Jølster Kommunale Automobilselskap vart lagt ned, og lastebilane overtekne av Firda Billag. Jølstra-lensmannen Nils Olsson Øvrebø, som hadde vore forretningsførar for det kommunale billaget, vart formann i representantskapen i Firda Billag.