| | Trur ikkje nevøen er rasist Publisert 28.05.2001 12:38 | Teikning Elin Fagertun | Eg kan ikkje sjå nokon rasist i nevøen min, sa tanta til hovudtiltalte i Beheim Karlsen-saka i dag. Tanta har adoptert to born frå Afrika og gav eit svært positivt inntrykk av hovudtiltalte.
Tor Erling Staff starta i dag sin vitneførsel. Han skal prøve å skape eit anna bilde av den hovudtiltalte enn det aktor, førstestatsadvokat Jan Hoel, gjorde i heile siste veke.
Og øvst på lista til Staff stod tanta til den hovudtiltalte. Ho og mannen har to adopterte born på ni og ti år frå Afrika. Dei har brukt den hovudtiltalte som barnevakt.
- Han er til å stole på og borna våre er veldig glade i han, sa tanta, som er busett i Førde.
Ho sa også at ho ikkje kan sjå nokon rasist i nevøen sin.
- Det vi opplever no er stikk i strid med alt det vi står for, sa tanta i retten. Ho gav sin nevø utelukkande positive skussmål, og hadde aldri høyrt han uttrykke rasistiske haldningar eller valdelege tendensar.
Hovudtiltalte er tiltalt for vald og truslar mot Arve Beheim Karlsen, og for rasisme. Sist veke høyrde vi fleire vitne fortelje at tiltalte brukte rasistiske uttrykk om og mot avdøde Arve Beheim Karlsen.
Men i retten i dag fekk vi eit heilt anna inntrykk.
Også ein tidlegare kjæraste av hovudtiltalte vitna i dag, og ho fortalte om ein snill gut. Heller ikkje ho hadde oppfatta at ex-kjærasten hadde rasistiske oppfatningar.
Men heilt til slutt i sin forklaring sa ho;
- Han er snill, men når han drikk blir han aggressiv.
| |
Seint fredag 23. april 1999 vart Arve Beheim Karlsen jaga over ei gangbru i Sogndal. Bak han kom to unge menn som i følgje tiltalen ropte "drep han" "drep denne negeren". Måndagen etter vart den indiskfødde 17-åringen funnen drukna i Sogndalselva.
|
|