Frå torsdag av har norgesmeisterskapen i volleyball for studentar gått av stabelen i Bergen. Eit lag frå Høgskulen i Sogn og Fjordane var med, og dei gjorde rett og slett reint bord i turneringa med dei 12 beste studentlaga frå heile landet.
– Me vann alle kampane me spelte, seier Jonas Nyløy Navarsete frå Sogndal, som var på vinnarlaget.
– Det er fantastisk herleg, det er ikkje noko å seia på det, seier han.
Slo bergensarane på heimebane
I finalen spelte dei mot Norsk Handelshøyskole frå Bergen, ein kamp som vart av det nervepirrande slaget
– Me vann det fyrste settet ganske komfortabelt, men det andre settet tok dei. Då var me verkeleg dårlege, men i det tredje settet vann me knipent 15–13.
– Når den siste ballen gjekk inn i vår favør sprang me rett inn på bana og skjønte kanskje ikkje heilt kva som hadde skjedd, seier Nyløy Navarsete.
Underdog
Mange av studentlaga spelar med dei same laga i den vanlege serien i volleyball. Laget frå HISF spelar til vanleg i den lokale andredivisjonen, og var å rekna som underdogs i denne turneringa.
– Me slo fleire studentlag som spelar i fyrstedivisjon til vanleg, so det var veldig moro å slå dei.
– Me har lyst å rykka opp til fyrstedivisjon, men me har ikkje nok ressursar til det. Då må det skje noko med sponsinga frå lokale krefter.
Vil til EM for studentar
Å driva med lagsport krev ein viss kontinuitet i laget. For eit lag som er berre for studentar kan det vera utfordrande.
– Mange reiser kvart år. I år fekk me heldigvis ein ny oppleggjar, noko me trengte. Nivået kan svinga veldig frå år til år, so me er avhengige av folk som skal studera her i minst tre år.
Neste år satsar dei på å kvalifisera seg til EM for studentlag.
Sigeren skal feirast med bankett i Grieghallen, før dei skal gjera noko anna studentar også tradisjonelt sett er flinke til.
– Det blir vel ein liten tur ut på byen seinare, det er studentane flinke til, smiler han lurt.