Meiner storkommunar er urealistisk

Jan Atle Stang i NHO presenterte i dag eit forslag med berre fire, store kommunar i Sogn og Fjordane. Han ser for seg storkommunar som skal bli del av ein stor Vestlandsregion ut frå NHO-sin tankegang, og få nye oppgåver.

Kysten som ein kommune med Florø som senter, store deler av Sogn som ein med Sogndal som kommunesenter, ein kommune midt i fylket med Førde som «hovudstad» og ein i Nordfjord aust for Vågsøy med Eid som kjerne.

Har ikkje tru på dette

Men at Selje og Vågsøy i nord skal vere i same kommune som Gulen i sør, blir umogleg trur ordførar Morten Hagen.

– Frå Vågsøy til Florø tek det to og ein halv time. Det å ha så lang tid til kommunesenteret, ser eg ikkje på som realistisk. Når vi i tillegg ser på ytterpunkta, frå Gulen til Selje, så tek det lenger tid enn å komme seg til Oslo, seier Vågsøy-ordføraren.

• LES OGSÅ: NHO-Stang vil dele inn fylket i berre fire kommunar

Han meiner at mykje må gjerast i forhold til samferdsla langs kysten.

– Den er altfor dårleg. Skal noko bli realisert i forhold til større kystkommunar, må vi få på plass gode vegløysingar.

(Artikkelen held fram under kartet)

Positivt i Flora

Medan Vågsøy-ordføraren er skeptisk, er varaordførar Jan Henrik Nygård (V) i Flora positiv til NHO sitt forslag om fire storkommunar i Sogn og Fjordane.

– Eg tykkjer det er eit veldig godt forslag å knyte saman heile kysten. Dette ville gitt ei fantastisk slagkraft som heile fylket har leita etter. Eg har sett resten av kartet og trur dette er vegen å gå, seier han.

Trur ikkje stort er best

Det er ikkje ordførar i Luster, Ivar Kvalen frå Senterpartiet. samd i. Han er skeptisk til forslaget om at dei skal vere med i ein storkommune i Sogn.

– Mi oppfatning er at det ikkje er aktuelt for Luster å vere med på noko sånt no. Ein slik storkommune betyr store avstandar og eg veit ikkje om det er til det beste for innbyggjarane, seier han.

Kvalen seier at forslaget om storkommunar, er eit mantra som NHO og Høgre-sida tek opp med jamne mellomrom.

– Det blir sagt at alt som er stort er bra, eg er ikkje heilt overbevist om at dette er godt fundert, seier han.

Meiner forslaget er spenstig

Lokalpolitikar Atle Hamar (V) i Jølster trur kommunane må ta diskusjonen om korleis dei skal møte krava om kva tenester ein skal tilby og organiseringa av det.

– Det er eit ganske spenstig og radikalt forslag. Vi i Sogn og Fjordane er nøydde å sjå på korleis vi skal ta innover oss stadig strengare og lovpålagde krav i forhold til tenester, seier Hamar.