Dette har han gjort i over 60 år

– Jauda, krabber skal vi få. Det blir ikkje problem, humrar 76-årige Harald Skjærli i det gamlebåten tøffar utover Førdefjorden.

16 hestar frå ein Saab dieselmotor syter for framdrifta på den stille og fine Førdefjorden. Grå skyer over fjellsidene meir enn antydar at regnvêret er i anmarsj.

– Utdøyande rase

For Skjærli gjer ikkje det noko som helst. Både ulltøy og regntøy er på plass. Dette har han gjort før. Og han blir aldri lei det.

I over 60 år har Skjærli drive med fjordfiske. Og fjordfiskarar er det ikkje mange att av i dag. Kvar morgon skal krabbeteiner både setjast og takast opp.

– Vi er ein utdøyande rase. Men det er interessant å sjå kva ein får, seier han og konstaterer at han er «biten av basillen».

Lite hummar

Denne tysdagsmorgonen er det ikkje mange hummarar i hummarteinene.

– Den er full i krabber, og då går ikkje hummaren inn, fortel Skjærli og legg til at han meiner det blir mindre og mindre hummar i fjorden.

– Det har vore fiska for mykje, og så var det lenge dei brukte å ta rognhummaren. Det har ikkje eg gjort sidan 70-talet. Eg har brukt å setje den ut att, legg han til.

Uvanleg fine krabber

Men om hummaren glimrar med sitt fråvær, er det tydeleg at det er mykje krabber i fjorden. Og dei er fine.

– Ja, krabbene er nokolunde bra i år. Det er sjeldan den er så bra, så tidleg som i år. Dei skal vere litt brune, men er dei heilt lyse, så er det som regel vasskrabbe eller så har dei nett skifta skal. Og då er det lite mat i dei, seier Skjærli.

Eigen plass

Fangsten varierer frå to-tre til 10–20 krabber per teine. På ein dag kan han få så mykje som 100 krabber. Desse vert haldne i live til laurdags morgon.

Då går turen til Førde sentrum og torget der, eller «Harald Skjærlis plass», som den vart døypt.

– Eg tykte det var litt grovt, humrar Skjærli og vender båten mot Leknes ved Vevring. Slusene opnar seg og den våte septembermånaden ser ut til å halde fram i inngangen av oktober.

Vil halde fram

Båten tøffar utover fjorden og med eitt har ein fjellområda Engebø der Nordic Mining har store planar om å vinne ut rutil. Desse planane har Skjærli lite til overs for. Han fryktar slam frå gruvedrifta vil øydeleggje livet i fjorden.

Dette både støttar og avviser rapportar i samband med planane. Men enn så lenge er det i alle fall liv både i og på fjorden.

Naturopplevingane gjer at Skjærli vil halde det gåande som fjordfiskar så lenge han «er oppegåande».

– Måsen følgjer meg stort sett heile tida, men her ein dag kom det bort to svaner og kika opp i båten. Eg trur det er nokre som er tamme, seier han.