Starta med siger - men berre så vidt nykomlingane fekk lov å spele

– Det var i tolvte time at vi fekk klarsignal om at dei kunne spele kampen, seier Førde-leiar Sindre Roska til NRK.no.

Førde styrkte stallen sin med oppleggjaren Kubiak og diagonalen Lubiejwskij ikkje lenge før seriestarten i eliteserien i volleyball.

• LES OGSÅ: Denne mannen er 2,07 meter høg - og er Førdes nye våpen i gulljakta

Men: Heilt inntil fredag kveld var det ingen av dei som hadde papira frå det internasjonale forbundet i orden. Ergo kunne dei heller ikkje spele den viktige kampen mot gullutfordrar Randaberg.

Først klokka halv åtte fredag kveld kom klarsignal etter intens jobbing frå Førde si side.

– Det var veldig viktig for oss at dei fekk vere med frå start og få kamptrening før kampane i europaligaen og nordic league seinare i haust, understrekar Sindre Roska.

(Artikkelen held fram under videoen)

Håpar å vinne titlar med Førde

Leiaren kunne saman med resten av Førde sjå at heimelaget fekk ein vanskeleg start på kampen i Førdehuset. For dei første tre setta var ruskete, og det var med naud og neppe at Førde halte i land det første.

Først i delar av fjerde sett spelte Førde som ein gullkandidat.

Kampen enda 3-1, med settsiffera 26-24, 26-28, 25–18 og 25–20.

• SJÅ KAMPFAKTA HER

– Det vart litt stress i starten. Men etter det gjekk det betre og betre, seier Blazej Kubiak.

Oppleggjaren slo inn seks poeng. Lubiejwskij enda på fem angrepspoeng frå sin diagonalplass. Han starta kampen, men vart etter kvart erstatta av Geir Eithun.

– Eg håpar vi kan bidra med noko, slik at Førde kan vinne titlar denne sesongen, seier Kubiak.

• LES OGSÅ: Førde VBK ladar opp i Polen

(Artikkelen held fram under biletet)

– Kan ikkje halde på slik

I kampen mot Randaberg var det likevel lokale spelarar som stod for det meste av underhaldninga. Lars Fredrik Tvinde slo inn 19 poeng – eitt poeng meir enn Mathias Loftesnes.

– Polakkane våre er nok framleis litt rustne, det er ei stund sidan dei har vore på ei volleyballbane. Marcin var snikkar på Hønefoss då vi oppdaga han – Blazej jobba som møbelsnikkar på Sunnmøre, seier Roska.

Trenar Frank Kalstad er letta over at Førde fekk med seg alle poenga mot eit så godt lag som Randaberg.

– Det var viktig å gå gjennom denne kampen utan å tape poeng, seier han.

– På det beste var det kjempebra, på det verste var det dårleg. Og slik kan vi ikkje halde på. Vi må få stabiliteten på plass, seier Kalstad.

• LES OGSÅ: Jonas Kvalen blir proff i Polen - og Førde får ein polsk oppleggjar
• LES OGSÅ: Førdespelarane lurt av nervane