Episodane fann stad i september i fjor. 47-åringen er tidlegare straffa, og møtte i Fjordane tingrett for eitt tilfelle av drapstrugsmål via Twittermeldinga, samt to tilfelle av skremmande og omsynslaus framferd per telefonsvarar.
Seint ein natt i slutten av september ringde mannen på privattelefonen til den Nav-tilsette. Kvinna er sambuar med ein politimann, og 47-åringen la inn fleire trugande utsegner.
La att tre krenkjande meldingar
Mellom anna sa han:
«Æ skal knus deg. Æ ska ta tak i den stygge næsa di. Æ ska vri den nihundre og nitti grader rundt. Du e et j ... svin. Og æ glær mæ til å vinn over dæ ...»
I løpet av ti minuttar la 47-åringen att tre krenkjande meldingar på telefonsvararen.
Nokre dagar seinare truga han den Nav-tilsette kvinna gjennom å leggje ut ei lydfil på Twitter med drapstruslar.
Kalla kvinna for tomskalle
Same dag sende han to meldingar til kvinna på hennar Facebook-profil der han mellom anna skreiv:
"Vi kan vel være venner du skjønne tomstkalle? Du er jo så uintelligent at det er på grensa til lekkert..... Det du har gjort nå vil få enorme konsekvenser for deg, men det er du vel for evneveik til å forstå. God helg snuppa!"
I retten sa 47-åringen seg delvis skuldig etter tiltalevedtaket.
Retten fann det bevist at mannen hadde posta Twitter-meldinga, trass i at mannen nekta for at det var han som hadde lagt teksten på lydfila.
Mannen forklarte at han kjende lite til Twitter, men retten synte til at mannen hadde hatt Twitter-konto i om lag halvanna år då den aktuelle lydfila vart lagd ut.
Har vore plaga av angst i årevis
Mannen erkjende også i retten at han hadde lagt att krenkjande meldingar på telefonsvararen til kvinna og sambuaren.
47-åringen forklarte at han på det tidsrommet stod framfor soning av ein dom frå Gulating lagmannsrett.
Han skal i over fleire år ha vore plaga av angst og depresjonar, og på tidspunktet meldingane vart lagde att, tok han mykje medisinar i kombinasjon med stort alkoholinntak.
Mannen hevda i retten at han ikkje hugsa å ha lagt att meldingar på telefonsvararen, og at han vart svært lei seg då han vart presentert for desse handlingane i fengsel.
Har hatt ei positiv utvikling
Retten var samd med aktor i at forholda samla sett kvalifiserte for ei vilkårslaus fengselsstraff på 45 dagar.
Men retten var også samd med aktor i at dei sterke allmennpreventive omsyna som talte for ei vilkårslaus fengselsstraff, måtte vike til fordel for omsyna som talte mot fengselsstraff i dette tilfellet.
Då mannen har hatt ei svært positiv utvikling inneverande år, og mellom anna fått seg arbeid, samt tilpassa medikasjon og kontrollert alkoholforbruk, sette retten straffa til 60 timar samfunnsstraff.
Straffa må gjennomførast i løpet av 120 dagar.