Mannen, som tidlegare i veka vart arrestert i Eid etter eit innbrotsraid, samtykka sjølv til varetektsfengsling.
Karen i 20-åra er tidlegare dømd for ei lang rekkje forhold og er no sikta for ti nye brot på straffelova og to brot på vegtrafikklova.
– Aktiv periode
Mannen er mellom anna sikta for innbrot, grove tjuveri, bilbrukstjuveri og vald, mellom anna mot polititenestemenn.
Tysdag vart han arrestert for båttjuveri, innbrotsforsøk i båt og innbrot i ein bensinstasjon. Mannen nekta å forklare seg for desse innbrota før fengslingsmøtet.
- LES OGSÅ: Jaktar innbrotstjuv i Eid
– I den siste tida har han vore svært aktiv. Vi har i samråd med juristen på saka funne ut at no vil vi setje ein strek, så difor vert mannen framstilt for varetekt, sa lensmann Webjørn Moa i Eid.
Aktiv periode
Auka aktivitet er også eit av argumenta Fjordane tingrett la vekt på då mannen vart fengsla torsdag. Retten la til grunn at forholda han no er sikta for, har samanheng med rusbruk.
Mannen vart også arrestert i mai etter at han tok seg inn og tømde Bunnpris-butikken i Holvik i Vågsøy for tobakksvarer. I samband med innbrotet stal og krasja mannen også ein bil. Desse forholda har mannen erkjent.
Politiet prøvde med meldeplikt for mannen, men også denne har mannen brote.
– På trass pågriping og fengslingssurrogat i form av meldeplikt, har sikta den siste tida vist at han ikkje evnar å avstå frå å gjere seg skuldig i ny kriminalitet, skriv tingrettsdommar Ida Kristin Bøen.