– Resultata kom fram under ein rutinemessig kontroll. Det analyserte resultatet synte at det er enterokokkar i vatnet, seier sakshandsamar Ingrid Marie Slinde.
Enterokokkar er ei gruppe bakteriar som tidlegare høyrde til i gruppa fekale streptokokkar, men som no vert rekna som ei eiga slekt. Denne bakterien finst normalt i tarmfloraen hjå menneske og dyr.
Truleg skit som er årsaka
Det er såleis grunn til å tru at det er skit frå dyr eller menneske som er årsaka til ureininga.
– Det er stort sett det som er årsaka, seier Slinde.
Ho presiserer at ein kan verte sjuk av slike bakteriar.
– Det er alvorleg, så det er viktig at folk kokar vatnet, seier Slinde.
Har UV-stråling av vatnet
Det vil bli teke nye prøvar som er ferdig analyserte i slutten av neste veke.
– Det trengst tre prøvar med utslag for å slå fast at det er ein bakterie der, seier Slinde.
Ho legg til at Skjolden vassverk har UV-stråling av vatnet, og difor skal ikkje slike situasjonar oppstå.
– Men ein kan aldri vere heilt garantert, seier Slinde.