Rørt tante såg nevøen blei fira ned

Redningsmannskapa har i heile dag jobba for å få ned to montørar frå ei 1x1,5 meter stor arbeidskorg - 100 meter over Nordfjorden.

– Heile familien har vaka i natt. Vi visste jo at dei måtte sitje der i natt, i svært dårleg ver, fortel Reidun Starheimsæter.

Mennene har arbeidd på kraftlina som går mellom Stavenes og Agjeld i Stryn. Måndag ettermiddag fekk dei tekniske problem med korga, slik at den ikkje kunne trekkjast attende. Eit Sea King-helikopter gav i 22-tida opp å redde ut mennene.

– Ekstremt spennande

Det har vore veldig dårleg ver, og dei to montørane frå Sogn og Fjordane Energi har hatt ei kald og våt natt. Heller ikkje i dag klarte helikopteret å heise dei to mennene opp. Difor blei dei fira ned til ventande båtar.

I 12.30-tida var den første av dei trygt nede, og like etter var også den andre mannen ombord i båten. Då hadde det gått over eit døgn sidan dei sette seg i korga for å jobbe på kraftlinja.

– Dette har vore ekstremt spennande å følgje med på, seier tanta til 18-åringen.

• LES OGSÅ: Fleire mislukka redningsforsøk - mennene måtte sjølv fire seg ned
• LES OGSÅ: Her har mennene overnatta i ei lita arbeidskorg 100 meter over fjorden

Vinka og smilte

Ho blei svært letta då dei var trygt på land. Ho fekk ikkje snakka med dei, for dei to karane blei dei raskt førde inn i ein ventande ambulanse.

Trass i at dei var kalde og våte etter over eit døgn 100 meter over fjorden, smilte og vinka dei då dei var berga ned.

– Eg såg at dei smilte og det var eit godt teikn, seier ho.