– Vi har pågripe personen. Vi har også funne båten som han hadde stole i natt, han låg ikkje så langt ifrå der han hadde stole han. Mannen vart pågripen i bustaden sin i føremiddag, seier lensmann på Eid, Webjørn Moa.
Mannen har nekta å forklare seg for politiet om hendingane.
– Han er difor frakta til arresten i Florø. Han vil truleg bli framstilt for varetektsfengsling i morgon, seier Moa.
Har hatt ei travel natt
- LES OGSÅ:
Mannen var tidleg ute på toktet sitt tysdag. Alt i 4-tida vakna Georg Piel, som eig og driv bensinstasjonen som er tilknytt bilverkstaden på Stårheim.
– Fleire skal ha sett ein person forlate bensinstasjonen. Vedkommande skal ha sett seg i ein båt og reist ut på fjorden, sa Piel til NRK.no i morgontimane.
Overvakingskamera på staden gav politiet tydelege bilete å gå etter, så det var ingen krevjande etterforskingsjobb for å finne fram til rett gjerningsperson.
Blir framstilt for varetekt
Moa karakteriserer mannen som ein kjenning av politiet.
– I den siste tida har han vore svært aktiv. Vi har i samråd med juristen på saka funne ut at no vil vi setje ein strek, så difor vert mannen framstilt for varetekt i morgon, seier Moa.
– Det betyr at mannen har mange forhold på samvitet?
– Etter kvart har han pådrege seg ganske mange, ja, seier Moa.
Han fortel at det var ei smal sak å finne fram til gjerningsmannen.
– Når vi først låg kor båten låg, så var det greitt å finne tak i han. Det gjekk utan problem, seier Moa.
– Vi ser saka som oppklart, og vi hadde god hjelp frå lensmannskontoret i Stryn med dette, seier Moa.