At det vil bli ein attraksjon er det vel nesten ingen som er usamde i. Dei spenstige planane inneber ein vegtunnel frå Lunde i Kjøsnesfjorden med 12 prosent stigning opp til 1500 m.o.h.
Her skal tunnelen ende i ein garasje inne i fjellet der folk kan ta seg rett ut på Tverrfjellet, like ved Jostedalsbreen.
- LES OGSÅ:
Ordførar i Jølster, Oddmund Klakegg (Sp), er full av iver og glød når han snakkar om prosjektet, men veit at det kostar. Tunnelen er no kostnadsrekna til 200 millionar kroner, og det er ikkje noko ordføraren kan grave ut av lomma på flekken.
– Dette er litt av den store oppgåva vi må gå laus på, for å finne ei finansiering som er dekkjande for å kome i gang med prosjektet, seier Klakegg til NRK.no.
Tilgang til brelandskapet året rundt
Det var i går at folka bak presenterte planen om ein vegtunnel like opp til Jostedalsbreen. Initiativtakarane seier dette vil gjere breen langt meir tilgjengeleg og opne opp for uante turmoglegheiter som til no berre har vore tilgjengelege for dei sprekaste av dei spreke.
– Tiltaket er utan synlege inngrep i naturlandskapet og vil gje tilgang til brelandskapet 365 dagar i året, seier mennene bak planane.
Men kven skal så betale for denne tunnelen?
– Det er klart at vi her må ha eit spleiselag. Eg ser føre meg privatkapital og statleg kapital, seier ordførar Klakegg.
- LES OGSÅ:
– Mykje må på plass
Så langt har det ikkje blitt gjort så mykje for å få på plass verken private kroner eller statlege middel. Klakegg seier dei har gått gjennom trafikkgrunnlaget og at dei meiner dette er godt.
– No må det lagast skikkelege detaljplanar, reguleringsplanar og ein må gå ein runde med offentlege styresmakter.
– Mykje av det må på plass før vi kan selje prosjektet til eventuelle investorar og få statleg finansiering, seier ordføraren.