Mannen vart send til Haukeland universitetssjukehus, og dei karakteriserer laurdag morgon skadane som kritiske.
Røykdykkarar frå E-CO Energi er no på staden for å få sett i gong ventilasjonsanlegget inne i tunnellen. – Vi må få ut røyken frå kraftstasjonen, slik at vi kan gå inn og sjå kva som har skjedd, seier informasjonssjef i E-CO Energi, Per Storm-Mathisen.
Veit ikkje årsaka
– Det er førebels uklart kva som er årsak til ulukka, men det må vere feil på ein komponent, seier Storm-Mathisen. Noko klart svar får ein ikkje før åstaden er undersøkt.
Den 63 år gamle mannen skulle sjekke ein feil på ein brytar inne i kraftstatsjonen, og var åleine på staden då ulukka skjedde i 01-tida. Han kom seg ut av området sjølv, og fekk varsla om hendinga.
Arbeidsulukke
– Saka blir no etterforska som eit alvorleg arbeidsuhell, og Arbeidstilsynet vil bli informert om saka. Vi har også varsla Direktoratet for samfunnssikerhet og beredskap, seier operasjonsleiar ved politiet i Sogn og Fjordane, Wenche Hope.
I samband med ulukka vart Aurland kommune utan straum, men Storm-Mathisen i E-CO Energi opplyser at straumen var tilbake etter nokre timar.
Saka vert vidare etterforska av politiet i Indre Sogn.