Lastebil trefte vifta som hang laust i tunnelen

Det var i føremiddag at politiet fekk melding om uhellet på riksveg fem mellom Florø og Eikefjorden.

• LES OGSÅ: Vogntog reiv ned vifte i taket - redusert framkomst på riksveg 5

– Traff den hardt

– Han må ha køyrt på vifta ganske hardt og rive den laus. Når eg kom køyrande so hang den lågare enn den skal, slik at eg traff den, seier Tennøy.

Han seier at situasjonen kunne blitt mykje farlegare enn den vart.

– Vifta var hardt skada, so det er vanskeleg å sei kor godt den hang fast i taket etter han hadde treft den. Eg vil anslå at den veg mellom 500 kilo og eitt tonn.

– Om noko slikt dett ned og treff ein bil, då skal dei i bilen vera veldig heldige om dei kjem derifrå utan skader, seier Tennøy.

– Må ha merka det

Sjølv fekk lastebilen hans to store riper på førarhuset.

– For å sei det slik: han må ha merka at han har vore borti den. Og skiltet som merkar høgdegrensa på utsida av tunnelen var bøygd ganske mykje.

– Eg har ikkje særleg sansen for slik køyring. Nokon er jo høgre enn 4,20 meter, som arbeidsmaskiner og slikt, men då må ein i alle fall fylgja med på kva du gjer. Alle kan vera uheldige, men då må dei sei ifrå slik at ikkje andre blir skada.

Må ha vore eit høgt vogntog

– Sundafjelltunnelen er skilta til 4,20 meter. Og viftene er iallfall 4,5 meter over bakken, seier seksjonssjef i Statens vegvesen, Margot Åsebø.

Ei tunnelhøgd på 4,20 vert rekna som normalt på ein riksveg. Åsebø stadfestar at vogntoget må ha vore ganske høgt for å ha teke oppi sjølve viftene. Men Statens vegvesen kjem ikkje til å gjere noko konkret med saka.

– Nei, me gjer ikkje noko. Men politiet har vore på staden, so saka vidare er opp til dei, seier Åsebø. Ho legg til at det skjer innimellom at vogntog tek oppi tunnelane.

– Det er ikkje veldig uvanleg, seier Åsebø.

– Men det er vel litt uvanleg når vifta heng på 4,5 meter?

– Vogntoget må nok ha vore litt høgt, ja, seier Åsebø.