Hopp til innhold

Badji har beklaga seg

Sogndal Fotball stadfestar at Stéphane Badji vart sett på tribuna på grunn av dårleg oppførsel. No har senegalesaren beklaga seg.

Stephané Diarra Badji på trening i Sogndal.

ALT OK: Stéphane Badji og Sogndal fotball har no skværa opp. Her med Tom Mangersnes

Foto: Sondre Dalaker / NRK

Det er Sogn Avis som skriv dette i papirutgåva tysdag.

Håvard Flo

REAGERTE: Spelarutviklar i Sogndal, Håvard Flo.

Foto: Rune Fossum / NRK

– Me ville markera at dette er eit lagspel, og at ingen kan heva seg over laget, seier spelarutviklar i Sogndal Fotball, Håvard Flo, til avisa.

Han seier at saka no er ute av verda, og at Badji er med att i troppen mot Tromsø på laurdag.

Det heile byrja då Badji vart bytt ut til fordel for Eirik Bakke i kampen mot Aalesund den 24. juni. Han nekta å ta veteranen i handa, og var tydeleg forbanna.

På søndag vart han sittande på tribuna då han såg lagkameratane tapa 1-3 for Fredrikstad på heimebane.

Sogndal-trenar Jonas Olsson nekta å kommentera saka etter kampen på søndag.

– Me tok ut den troppen som me trudde hadde størst sjanse til å vinna i dag, men dessverre so lukkast me ikkje, sa Jonas Olsson etter kampen.

– So det har ingenting å gjera med at han mislikte å bli bytt ut i førre kamp?

– Eg vil ikkje kommentera det, sa Olsson.

Men no har altso pipa fått ein annan lyd...

(Artikkelen held fram under biletet)

Badji på tribuna då Sogndal tapte

PÅ TRIBUNA: Mot Fredrikstad i helga var Badji (innfelt) på tribuna.

Foto: Sondre Dalaker/Heidi Lise Bakke / NRK

Badji var tilbake i Sogndal-drakta då andrelaget knuste Veitastrond 10-0 på Leikvoll stadion på søndag. Til Sogn Avis var han audmjuk etter kampen.

– Det eg gjorde mot Aalesund var dumt gjort. Eg ba om orsaking etterpå, seier han.