Streik kan lamme cruisetrafikken

Frå onsdag morgon blir alle dei 102 losbåtførarane i Norge tekne ut i streik dersom det ikkje blir semje mellom YS Stat og staten som er arbeidsgjevar.

Losane er avhengige av at losbåtførarane er på jobb for å kunne utføre arbeidsoppgåvene sine. Dermed vil ei utviding av streiken ramme heile lostenesta. Frå før er denne tenesta i Oslofjorden ute i streik.

Hardt ramma i Flåm

Hamnesjef John Erik Johnsen i Aurland Hamnevesen seier ein streik vil ramme dei hardt.

– Det vil bli enorme inntektstap. Vi har i gjennomsnitt 1500 passasjerar på kvar cruisebåt i Flåm. Dersom ikkje skipet kjem seg inn til oss, vil det bety 1,5 millionar i tap på kvart skip. Det er inntekter vi har på transport, handel og mat, seier han.

• LES OGSÅ: Gode budde før streike-opptrapping

Vil ikkje få los om bord

Narve Leonhardsen som er leiar i Losbåtførernes forbund, seier at ei opptrapping av streiken vil råke tilbringartenesta for losane.

– Det vil seie at det ikkje lenger er mogleg å få sett los om bord i båtar på havet. For Sogn og Fjordane sin del, vil det i hovudsak ramme cruisetrafikken på Sognefjorden. Industrisamfunna Årdal og Høyanger vil også få merke dette, seier han.

• LES OGSÅ: Mange vil merke streiken til uka
• LES OGSÅ: – Oslo taper millioner på streiken

Håper på løysing

Han fortel at dei store skipa får losen sett om bord på havet via ein losbåt. Losen går om bord i skipet, blir med til hamna og så ut på havet igjen.

– Men når losbåtførarane streikar, er det ingen til å frakte losen til skipet eller hente han etterpå, seier Leonhardsen.

Han seier dei håper å unngå å gå ut i streik, men er ikkje optimist.

– Vi håper arbeidsgjevaren kjem med eit tilbod, for det er veldig trasig å streike. Men eg har ikkje høyrt at det skal ha vore kontakt mellom partane, så det spørst om det blir ei løysing til onsdag morgon.

Kan bli liggjande i hamna

Blir det streik, vil cruisebåtar som ikkje har kome seg ut av Sognefjorden, bli liggjande fast.

– Dei må komme seg ut før ein eventuell streik startar, eller la vere å gå inn, seier han.