Over 30 geiter miste livet i haust - no set Vegvesenet ned fartsgrensa

Bileta av dei ihelkøyrde geitene som låg drepne langs vegen fekk debatten om bilkøyring i beiteområde til å blusse opp for fullt.

Dyr i vegbana skaper stadig vekk trafikkfarlege situasjonar, og det er eit problem for både bilistar og bønder. Men kva skal ein gjere for å unngå slike tragediar igjen?

Statens vegvesen har no diskutert fleire alternativ og har kome fram til at lågare fart er den beste løysinga. Farten blir sett ned frå 80 km/t til 70 km/t i sommarsesongen.

– Vi håpar at bilistane skal vere litt meir merksame på dyra som ligg i tunnelmunningar og i vegbana, seier Gaute Strømme i Statens vegvesen til NRK.no.

• LES OGSÅ: Nattbussen køyrde rett i geiteflokk

– Det var heile geiter og halve geiter

Det var i september i fjor at ein buss på veg frå Oslo til Førde brasa inn i ein flokk geiter som låg og sov i vegbana. For geitebonde Ole Kristian Kjøsnes vart det ein vond dag som han seint vil gløyme.

– Det er heilt vanvittig, slikt skal ikkje skje. Det var heile geiter og halve geiter, og delar av geiter overalt. Eg tenkte at det går ikkje an at slikt skjer. På ein strekning på 20 meter låg det kadaver overalt. Det var eit grufullt syn for ein som driv med dyr, sa han til NRK.no den gong.

I etterkant har Vegvesenet jobba tett saman med beiteeigarane for å finne ei løysing for å redusere risikoen – både for geitene og bilistane som ferdast på vegen gjennom området.

• LES OGSÅ: «Staten må hindre dyretragedier»
• LES OGSÅ – Det står ikkje alltid på pengane, men på samarbeidet med bøndene

(Artikkelen held fram under biletet)

Bondelagsleiaren er nøgd

Leiar i Sogn og Fjordane Bondelag, Per Hilleren, sa sist haust at det var staten sitt ansvar å finne ei løysing. Han kravde då at det skulle byggjast både undergangar og gjerde for å sikre dyra.

At vegvesenet no har gått inn for å setje ned farten frå 80 km/t til 70 km/t er han glad for.

– Eg synest det er bra at det vert sett i gang nokre tiltak som kan vere med å gjere det betre for dei som har beitedyr og som brukar dette arealet til å produsere mat.

• LES OGSÅ: Politiet etterforskar buss-sjåfør

Vil ikkje refleksmerke dyra

Fleire gjerde, ferister, og til og med refleksmerking av beitedyra er blant tiltaka som vegvesenet har hatt på blokka, men dette har det altså ikkje blitt noko av. Iallfall ikkje i denne omgang.

– Vi har vurdert alt frå klaver med refleks som heng rundt halsen på storfé, og øyremerke med innemerka refleks på mindre dyr, seier Strømme.

Ved å setje ned fartsgrensa håpar dei no at bilistane tek ansvar.

– Det er uansett bilføraren si plikt å vere aktsam og tilpasse farten etter forholda, seier Strømme.

• LES OGSÅ: Meiner også sauer, kyr og geiter må ha refleks når dei går langs vegane
• LES OGSÅ: NAF: – Der det ikkje blir sett opp gjerder må ein slakte ned buskapen
• LES OGSÅ: – Uaktuelt å slakte ned buskap

(Artikkelen held fram under)

– Har plassert ansvaret der det høyrer heime

Hilleren i Bondelaget synest ikkje det gjer noko at beitedyra i Kjøsnesfjorden førebels slepp å gå med refleks.

Med nye skilt og lågare fartsgrense er ansvaret for tryggleiken plassert der det høyrer heime, meiner han.

– Ja, no har iallfall føraren fått eit heilt tydeleg og klart varsel på at her er det husdyr og at ein må vere vaken og setje ned farten, seier Hilleren.