Den varsla brødaksjonen til dei aksjonerande bøndene går sin gang landet rundt. I Førde var hyllene på Coop Mega nesten heilt tomme allereie tidleg på føremiddagen.
Lidvard Befring fekk akkurat sikra seg to brød, og var på veg til neste butikk for å få tak i fleire.
– Eg må ha slik at eg har for ei veke.
– Er det vanleg at du hamstrar på denne måten?
– Nei, men eg skjønte at dette kom til å skje, seier Befring.
- LES OGSÅ:
- LES OGSÅ:
(Artikkelen held fram under biletet)
Brødaksjonen går sin gang
Sinte bønder over heile landet har dei siste dagane vist kva dei synest om Statens sitt tilbod i landbruksoppgjeret. Dei har kalla dei 900 millionane eit skambod, og braut laurdag forhandlingane. Kravet om 2,2 milliardar ville den raudgrøne regjeringa ikkje innfri.
- LES OGSÅ:
- LES OGSÅ:
Bondeorganisasjonane varsla i går at dei i dag ville blokkere fire store mjølanlegg og tømme butikkane for brød. I Florø melder Nils-Magne Gjengedal at brødaksjonen går sin gang.
– Det er fleire bønder som har vore rundt og kjøpt opp brød, så eg trur nok det har byrja å minke, seier han til NRK.no tidleg tysdag ettermiddag.
Skal fôre dyra med restane
Han seier enkelte har reagert og lurt på kva bøndene skal med alt brødet. Gjengedal lover at dei ikkje let brødet gå i bosset.
– Sjølvsagt skal vi ete brødet, vi hiver det ikkje. Det vi ikkje et sjølve, det får dyra våre, seier Gjengedal som er styremedlem i Sogn og Fjordane bondelag.
– Dette råkar vanlege folk?
– Ja, det gjorde smørkrisa også det. Vi prøver å synleggjere at det «daglege brød» ikkje er sjølvsagt lenger.
I tillegg til brødaksjonen har bøndene også sperra både vegar og parkeringsplassar. Dei har «kidnappa» ordførarar, medan ein annan ordførar fekk ei ku på døra.
I Florø har bøndene i dag også sperra av fleire parkeringsplassar ved å kjøpe opp alle plassane.
- LES OGSÅ:
- LES OGSÅ:
- LES OGSÅ:
- LES OGSÅ:
– På tide at folk forstår alvoret
Gjengedal er klar på at dei ikkje ønskjer å terge på seg folk, men at dei vil vise folk kva dei meiner.
Han seier bøndene er svært frustrert og opplever tilbodet frå regjeringa som eit slag i trynet.
– Det er ikkje sikkert at folk kan halde fram med å kjøpe mat når dei vil, slik det har vore til no. Vi kan ikkje garantere at det er nokon vil ta over gardane våre med den lønsveksten vi har, seier Gjengedal.
– Vi må synleggjere alvoret i dette, og det er på tide at folk forstår det.
- LES OGSÅ:
– Lever i ei boble
Han fortel vidare at dei har fått mykje støtte frå folk flest under aksjonane, og meiner mange har forståing for at bøndene må tene meir på jobben sin.
Toppleiinga i dei politiske partia har derimot ikkje forstått alvoret, meiner Gjengedal.
– Dei lever i ei boble og trur dei berre kan kjøpe frå utlandet. Men folk i utlandet treng maten sin sjølve.
(Artikkelen held fram under biletet)
Fleire må gå tomhendt
På butikken i Førde merka butikkmedarbeidar Olaug Øyestad allereie tidleg på dag at det var folksamt rundt brødhyllene.
– Det har vore trøkk heile tida, og no når det er gått tomt spør folk om vi ikkje har meir, seier Øyestad til NRK.no.
Ein som må gå tomhendt frå butikken er Oddmund Frøysland. Han er sjølv bonde, men var ikkje på butikken for å hamstre.
– Eg har kjøpt det eg har bruk for, seier Frøysland som naturleg nok støttar opp om aksjonen.
– Bøndene får for dårleg betalt, så at fleire aksjonerer er forståeleg.
– Dårleg av politikarane
Også Lidvard Befring støttar brødaksjonen til bøndene. Han har sjølv gitt seg som bonde og er misnøgd med politikarane.
– Det er dårleg av dei at dei ikkje kan gje bøndene meir i løn. Bøndene ligg langt etter dei andre lønsgruppene, seier Befring.