Bil og lastebil kolliderte i tunnel

– Ein bil og ein lastebil har støtt saman inne i Røneidtunnelen. Det er fem personar involvert, får NRK.no opplyst ved operasjonssentralen.

To personar vart sende til legesjekk, men etter det NRK forstår skal det ikkje vere snakk om større personskader. Det sat tre personar i personbilen, og det var to personar i lastebilen.

Lastebilen hadde ei asfaltmaskin på planet. Ifølgje skadestadsleiar er det for tidleg å seie om lastebilen køyrde sentrisk i tunnelen.

Køyretøya skal ha kollidert front mot front, men dei skal ikkje ha hatt stor fart då uhellet skjedde.

– Det er store materielle skader. Bilbergar var på staden for å rydde opp, opplyser politiet.

Røneidtunnelen er omlag 600 meter lang og utan telefondekning. Tunnelen var ein periode stengd for trafikk, men var opna ved ti-tida.