Mannen vart meldt sakna natt til måndag då rutebåten «Dagning» såg ein liten fritidsbåt av typen Bella drivande i Florøvika.
Om bord låg ein mann og sov. Han opplyste at det også skal ha vore ein til i båten. Vedkommande skal ha falle over bord i samband med urinering.
– Det nærmar seg 50 mann som deltek i søket, samt ein del småbåtar og to hundeekvipasjar frå Norske redningshundar, fortel operasjonsleiar Einar Vereide hos Sogn og Fjordane politidistrikt.
(Artikkelen held fram under biletet)
Konsentrerer søket
Det har måndag blitt søkt med Brandsøy, Florø og Årebrot som primærområde. Etter kvart er søket konsentrert nord for Botnaneset.
Mannen i båten har i avhøyr med politiet forklart at han sjølv ikkje såg kameraten falle over bord. Han skal ha sjølv oppdaga at kameraten var sakna og skal ha leitt etter han.
– Det har etter kvart blitt stadfesta at vi søkjer i det mest aktuelle området. Vi har søkt der det er mest truleg at han har falle på sjøen, opplyser Vereide.
(Artikkelen held fram under biletet)
Redningsaksjon
Vereide seier dei framleis skildrar leiteaksjonen som redningsaksjon. Båten var på veg frå Norddalsfjord då mannen fall over bord.
Politiet har i løpet av måndagen heller ikkje kome over noko som tilseier at mannen ikkje skal ha falle over bord.
– Søket går føre seg framleis, med både mannskap frå land og frå småbåtar som søkjer langs strendene, holmar og skjær, seier Vereide.