«Ein veg so gjere meg gal - Aldri open alltid staingd å altfø smal»

Joacim Styve og medlemmane i bandet «RAASKINN» har teke føre seg eit tema som er svært kjent blant innbyggjarane i Årdal.

– Dette er ein tekst som folk her i lokalområdet kjenner seg svært godt att i, vegen er jo stengd halve året, fortel Joacim Styve.

Han står for tekst og melodi i songen «Årdal-Tyin: Stengd», som bandet «RAASKINN» har spelt inn i Hugin Musikkforum, og musikkvideoen av Bjørge Kilen er filma i studio.

– Det er jo heilt komisk

Teksta er inspirert av dei mange problema som oppstår som følgje av vegstengingane, særleg «Verket» eller Hydro som dreg mykje folk til bygda med pengar til å byggje seg hytte.

– Der er jo skikkeleg flotte og eksklusive hytter til fleire millionar der oppe, og ein får berre brukt dei eit par gonger i året fordi vegen alltid er stengd, fortel Styve.

– Folk torer knapt å reise opp fordi dei kan risikere å verte sitjande der oppe i dagevis dersom vegen plutseleg stenger. Det er jo heilt komisk, legg tekstforfattaren til.

Tittelen på songen kjem av teksten på skiltet som opplyser om at vegen er stengd.

– Berre eit vindpust og litt snø så lyser tavla oppe på Verket. «ÅRDAL-TYIN: STENGD», fortel Styve og flirer.

• LES OGSÅ: Historia om vegsambandet Årdal–Tyin i fylkesleksikonet

Stengd i 728 timar

Og «RAASKINN» og Styve har all statistikk på si side, for vegen er stengt fleire gonger i veka. Tal frå Statens vegvesen viser at sidan 26.11.2011 har fylkesveg 53 blitt stengt 41 gonger - totalt 728 timar, seinast natt til i dag frå 22:30 – 08:00.

– Det er jo veldig spesielt at dette ikkje vert gjort noko med. Når borna mine vert større kjem dette sikkert til å irritere meg endå meir, sidan vi då kjem til å reise opp for å stå på ski, fortel Styve.