Ei 14 år gamal irakisk jente, som har budd seks år i fylket, er ei av 450 asylborn som når som helst kan bli kasta ut av landet etter å ha fått avslag på sine søknader om asyl.
- LES OGSÅ: Navarsete ber regjeringa snu
– Det er heilt forferdeleg at ei jente som har vore her halve livet sitt, har sine venner her, går på skule her. Det er dette som er hennar land. At ho skal gå rundt og vere redd for å bli sendt ut kvar einaste dag er horribelt, seier Malene Indrebø Langl, leiar i Sogn og Fjordane AUF.
Klar Faremo
Denne veka sa justisminister Grete Faremo (Ap) at regjeringa ikkje ynskjer å gje asylsøkjarforeldre von, slik at dei trekkjer ut tida i håp om å få bli i Norge. Difor seier regjeringa at papirlause born skal ut av landet.
- LES OGSÅ: Asylmottak vurderer kriseteam
– Det er ikkje snakk om amnesti. Alle som søkjer om opphald i Norge får sine saker grundig vurdert og det er jo Utlendingsnemnda som avgjer endeleg kven som får opphald eller ikkje, sa ei klokkeklar Faremo.
- LES OGSÅ:
Asylpolitikken til regjeringa møter motbør. Martin Kolberg (Ap) har bede eige parti snu i asylpolitikken, Marianne Borgen (SV) er flau over eiga regjering, medan opposisjonen er del av eit stortingsfleirtal som krev barneutsendingane stogga.
Frykt kvar dag
NRK møter den 14 år gamle irakiske jenta på ein kafé saman med AUF-leiaren i Sogn og Fjordane.
Jenta fryktar å bli kasta ut når som helst, og ynskjer ikkje å stå fram med namn.
– Eg er redd for å bli sendt ut. Det er krig der også. Det går ikkje an å bu der og eg tenkjer ofte på det. Kvar dag. Eg trivast veldig godt på skulen, har mange vener og har lært språket, så eg vil helst ikkje bli sendt ut av landet, seier ho.
– Forferdeleg
– Alle dei borna som har vore her lengre enn tre år, må få sakene sine opp på nytt. Per dags dato er det 450 born som har Norge som sitt land. Dei kan ikkje berre bli sendt ut på den måten. Det forstår alle at det ikkje går, legg Indrebø Langlo til.
Eva Richter, Ap-politikar og tidlegare leiar asylmottaket på Jølster, seier ho vil vurdere sitt eige medlemskap i partiet dersom borna blir sendt ut.
– Eg beklagar det. Eg beklagar det veldig. Eg er veldig glad for at AUF er så tydelege og utfordrar makta i denne asylpolitikken, seier ho.
Borna først
Fylkesleiaren er ikkje nådig i kritikken mot sin eigen justisminister, og lovar at AUF skal kjempe med nebb og klør for å få moderpartiet til å snu.
Indrebø Langlo meiner omsynet til borna må vege tyngst, sjølv om familien kanskje ikkje har rett på opphald.
– Det er ein forferdeleg asylpolitikk som må forandrast. Det stiller AUF seg knallhardt bak, avsluttar ho.