Det har gått seks store skred i Stryn

– Vi har fått melding om at det har gått seks ganske store ras på fylkesveg 722 mellom Stryn og Flo. Politiet er no på staden og tek seg forbi rasstadene til fots for å komme seg inn til Flo og snakke med dei som bur der, seier operasjonsleiar ved Sogn og Fjordane politidistrikt til NRK like før klokka 13.30.

Det er førebels ingenting som indikerer at folk eller bilar skal vere tekne av raset.

– Rasa har gått i eit område som ikkje er busett, seier Rimmen.

Har bedd om geolog

Han har førebels ikkje tal på kor mange personar som no er innestengde på Flo.

– Det er også rekvirert geolog for å vurdere rasfaren i området, seier Rimmen.

Situasjonen er prekær i høve det å få ut informasjon, då det er enorme problem med tele- og datanettet i Stryn kommune.

– Det er absolutt ingen telefondekning i Stryn, seier Rimmen.

Politiet fekk melding om rasa klokka 12.14.

Ber folk halde seg heime

Ordførar i Stryn, Sven Flo, stadfestar at det har komme mykje nedbør i området, og at det har rasa mykje. Han oppmodar folk om å ikkje reise ut på vegane om det ikkje er naudsynt.

– Vi vil ikkje at folk skal røre seg ute i det heile teke. For rasfaren er stor, seier Flo.

Politi og anna mannskap er på veg ut til rasområda, og veit lite om kva som ventar dei.

(Artikkelen held fram under biletet)

Svært vanskeleg situasjon

– Situasjonen er svært uavklart. Vi har folk på veg, men vi har overhovud ikkje kontakt med folk i området. Vi veit ikkje om folk er tekne av nokon av rasa, eller kva vi eventuelt skal gjere om det er nokon som er tekne av ras, seier operasjonsleiar Per Rimmen ved Sogn og Fjordane politidistrikt.

– Vegvesenet har enno ikkje fått kontakt med entreprenøren på grunn av manglande telefonlinje, men vi jobbar med å skaffe oss ei oversikt, seier operasjonsleiaren ved vegtrafikksentralen i Lærdal.

Sikre på at ingen var tekne

NRK hadde i 16.30-tida tysdag kveld kontakt med ordførar Sven Flo. Han kunne då fortelje at eit helikopter har undersøkt rasstaden frå lufta, og ein har til no ikkje fått bekrefta mistanken om at bilar eller personar er råka av raset.

Seinare tysdag kveld stadfestar politiet at dei er sikre på at ingen personar eller bilar vart råka av rasa.

Dei seks rasa skal ha gått mellom Veslebygda og Flo. Vegen vil truleg vere stengd ei god stund, og etter det politiet kjenner til er det aktuelt å opprette eit båtrute.