Får millionar etter persiennefeil

Det har Bergen tingrett bestemt etter at Sandane-firmaet tok saka til retten.

Skanska var totalentreprenør og Bolset var totalunderleverandør då Bergens største kontorbygg blei oppført. Bygget stod ferdig i 2008 og mykje av fasaden er dekt av vindauge som ikkje kan opnast.

• Les meir om Bolseth Glass i Fylkesleksikonet

Kan bli dyrt

Dei spesielle vindauga har innebygde og motoriserte persienner. Men etter kort tid viste det seg at 44 av persienneglasa hadde funksjonsfeil og blei bytta ut. No pågår det i tillegg utskifting av ytterlegare 26.

Skanska har nekta å betale for dei nye persiennene fordi dei meinte funksjonsfeilen låg i leveransen til Bolseth.

Bergen tingrett meiner at årsaka til problema ligg i styringssystemet som Skanska leverte og ikkje i sjølve glasa.

Det er over 460 persienneglas på bygget. Dersom det viser seg å vere feil på alle saman, kjem det til å koste over 17 millionar kroner.

Meiner dommen er rett

Advokaten til Bolset Glass AS, Brynjulf Næss, er nøgd med dommen frå tingretten.

– Vi meiner den er rett og er i samsvar med det vi hevda, seier han til NRK.no.

Fristen for å anke går ut i januar og Næss er spent på om motparten nyttar moglegheita til det.

– No får vi berre sjå kva dei gjer, seier han

Skanska må også betale Bolseth sine sakskostnader på over 960 000 kroner, i tillegg til sine eigne.