Føraren mista kontrollen over bilen, ein Ford Sierra, på veg i retning Hella. Bilen tok til å brenne etter ulukka.
Dei to ungdomane sat ei tid fastklemde, men vart berga fri frå det brennande bilvraket av snarrådige forbipasserande med førstehjelpskunnskap.
– Vi kom til staden og gjorde vårt beste for å hjelpe dei to ungdomane, fortel ein av dei til NRK.no.
Kløyvde skilt
Ulukka skjedde på fylkesveg 55 like ved kyrkjegarden ved Tinghus 2. Augevitne fortel at bilen kom i retning Hella då føraren mista kontroll på bilen og kom over i feil køyrefelt. Der skal den ha treft ei sandkasse tilhøyrande Statens vegvesen.
Bilen skal så ha floge i lufta og gått via ei gravemaskin før den kløyvde i eit fotgjengarskilt. Bergingsmannskap seier dei snarrådige forbipasserande truleg berga livet til ungdomane.
– Vi fekk melding om ulukka via AMK. Begge personane som var i bilen har kome seg ut, fekk NRK.no opplyst ved politiet sin operasjonssentral i Florø kort tid etter ulukka.
Til sjukehus
Begge dei to ungdomane blir frakta til sjukehus med helikopter. Den eine med luftambulanse til Førde, den andre med Sea King til Haukeland.
AMK opplyser i 23-tida at den eine, ein 21-åring, er lettare skadd. Det er førebels uvisst om pasienten blir lagt inn på vanleg avdeling eller på intensivavdelinga.
Tilstanden for den andre pasienten, som er i slutten av tenåra, er førebels uviss. Politiet kan ikkje seie noko om årsaka til ulukka.
– Bilen skal ha køyrt inn i vegarbeidsområdet, men det er uklart kva som har skjedd, opplyser politiet.
Ulukkeskommisjonen frå Statens vegvesen skal hjelpe politiet med å undersøkje staden der ulukka skjedde. Saka blir etterforska vidare av lensmannen i Sogndal.