Meiner buss er mykje betre enn båt

Politikarane i fylket skal denne veka avgjere om dei skal halde fram med å løyve pengar til Sognebåten, trass i at den har langt færre reisande enn bussen mellom Sogn og Bergen.

– En slik båt er jo langt større, og har større kapasitet enn ein buss. Den er jo langt dyrare å køyre og langt mindre miljøvenleg, så vurdert utfrå endepunktstrafikken mellom Sogndal og Bergen så er det vel ganske opplagt at det er meir hensiktsmessig å satse på bussen, meiner avdelingsleiaren i TØI.

Han meiner og at bussen er også billegare og mindre vêravhengig, og at det er mykje lettare å få til stogg der folk bur og ferdast.

Nøgd med tal reisande

Sognebåten har kvart år om lag 70.000 reisande. Båtruta frå Sogndal til Bergen får årlege tilskot på 12 millionar kroner.

• LES OGSÅ: Kvar reisande med Sognebåten kostar fylkeskommunen 171 kroner

Ekspressbussrutene frå Sogndal til Bergen derimot, hadde i fjor 80.000 reisande. I tillegg hadde SørVestEkspressen som går frå innom Lærdal mellom Bergen og Lillehammer, om lag 100.000 reisande.

Avdelingsleiar i Fjord1 Sogn Billag, Else Nesøy er nøgd med belegget til bussane;

– Det har vore bra, eg trur det har litt med frekvens å gjera. Vi har fleire avgangar. Vi er kanskje meir tilgjengeleg for publikum, meiner Nesøy.

• LES OGSÅ: Kan gå mot slutten for Sognebåten | Ingen vil kutte Sognebåten

Meiner båten er for dyr

Idar Mo, som i mange år arbeidde med reisevanar i samferdsleavdelinga til fylkeskommunen, er og framleis ein ivrig forkjempar for buss framfor båt. Han meiner at heilårsdrift av Sognebåten er alt for kostbar.

– Vegane vert utbygd, og ekspressbussdrift er langt billegare. Denne heilårsdrifta i framtida med Sognebåten, den skulle ikkje vere nødvendig no når ein utviklar vegnettet enda meir, meiner Mo.